Alaksandr Łukašenka abvinavaciŭ staršyniu Minabłvykankama Leanida Krupca ŭ padačy niedakładnaj infarmacyi pa sielhasrabotach,paviedamiła pres‑słužba prezidenta pa vynikach pieršaha dnia jaho rabočaj pajezdki pa paŭdniovych rehijonach krainy.
U pryvatnaści, Krupiec raniej dakładvaŭ Łukašenku, što na terytoryi jaho rehijonu stopracentna prybrana z paloŭ letašniaja sałoma. Adnak tolki ŭ Lubanskim rajonie, kudy prybyŭ biełaruski kiraŭnik, nieprybranymi zastalisia 68 ha. «Stvarajecca ŭražańnie, što ŭ vas jak byccam tolki ŭčora skončyłasia ŭboračnaja. Vy tolki pačynajecie prybirać sałomu. U vas ni na adnym poli nie pracuje technika, a tolki tut, dzie pryziamliŭsia viertalot prezidenta», — adznačyŭ Łukašenka.
Jon zapatrabavaŭ razabracca ź situacyjaj i daručyŭ kantrolnym strukturam dać jamu abjektyŭnuju infarmacyju jak pra hatoŭnaść paloŭ da viesnavych rabot, tak i pra chod pasiaŭnoj.
«Dzie niedakładnaja infarmacyja — adrazu infarmujcie mianie, prymiem rašeńni až da adstaŭki ludziej. Pa hubiernataru raźbiaremsia i pa ministru taksama, a to hubiernataru chłusiać, a jon — mnie. Hetaha nie pavinna być», — skazaŭ Łukašenka.
Jon «žorstka raskrytykavaŭ» pracu miascovaj ułady i Minsielhascharča pa «naviadzieńni paradku na ziamli i vykanańni technałohij ahrapramysłovaj vytvorčaści».
Padčas naviedvańnia rajona prezident zajaviŭ, što naroŭni sa stvareńniem ahraharadkoŭ asablivaja ŭvaha budzie nadadziena raźvićciu bujnych viosak. «My budziem raźvivać bujnyja vioski, budavać tam žyllo dla ludziej, jakija zastajucca žyć na siale, — skazaŭ Łukašenka. — Treba dumać pra «druhuju chvalu» paśla ahraharadkoŭ: pra bujnyja vioski, jakija my dobraŭparadkujem i pastupova budziem dabaŭlać. Niachaj u haspadarcy budzie dźvie‑try pierśpiektyŭnyja viosački, dzie my, moža, i nie pabudujem kłub i škołu, ale pavinny stvarać narmalnyja ŭmovy dla žyćcia, infrastrukturu».
«Jak było dakładziena prezidentu, na Paleśsi pajšła tendencyja pavieličeńnia popytu na žyllo», — paviedamlaje pres‑słužba. «Kali tak budzie pa ŭsioj krainie, to heta śviedčyć ab tym, što my pieramahli, što my vielmi pravilna pravodzim liniju pa adradžeńni siała. Kali niama popytu na žyllo, značyć, ludzi tudy nie iduć. Tamu mianie raduje hety fakt», — skazaŭ Łukašenka.
Ministr sielskaj haspadarki i charčavańnia Siamion Šapira paviedamiŭ, što ŭ miasa‑małočnaj halinie nazirajecca pryrost pa ŭsich pakazčykach. Z pačatku hoda stanoŭčaje salda bałansu ekspartu — impartu sielhaspradukcyi skłała 400 młn. dołaraŭ ZŠA. Pa vynikach hoda čakajecca, što hety pakazčyk pieravysić 1 młrd. dołaraŭ.
13 krasavika Łukašenka znachodzicca ŭ Pinskim rajonie.
