Jurja
paleskaje śviata ŭradlivaści Kust
Da tradycyjnaha śviata Jurja, 23 krasavika, na rekłamnych stendach u biełaruskich kaviarniach źjavicca paštoŭka «Budźma ź biełaruskimi śviatami!». Na paštoŭcy — mastkoŭskaje bačańnie śviata, a na jaje advarotnym baku — karotkaje tłumačeńnie jahonaj sutnaści. Aŭtar malunkaŭ —paet i mastak Michał Aniempadystaŭ.
«Jurjeŭski» asobnik zrobicca pieršym u sieryi z 12-ci paštovak. Ideja sieryi, inicyjataram jakoj zrabiłasia hramadskaja kampanija «Budźma biełarusami!», — papularyzavać i aktyvizavać tradycyjnyja śviaty sielskahaspadarčaha kalendara.
Paśla Jurji miarkujecca vypuścić paštoŭku, prytarnavanuju da viesnavoha śviata Kust, jakoje adznačajuć zbolšaha ŭ Paleśsi, a taksama letnich Rusalii i Kupalla. Usiaho płanujecca vydać 12 paštovak, siarod jakich buduć asobniki, pryśviečanyja Dažynkam, Bahaču, Syrnamu Tydniu (Maślenicy) dy inšym.
Rekłama na darmavych paštoŭkach — daŭno viadomy va ŭsim śviecie prajekt, jaki karystajecca vializarnaj papularnaściu siarod maładych. Jaho sutnaść— raspaŭsiud rekłamy i hramadskaj infarmacyi pa sietcy stendaŭ, jakija visiać u kaviarniach, dyskatekach i ŭ modnych kramach. Naviednik padychodzić da takoha, ustalavanaha zazvyčaj la ŭvachodu, stenda, i siarod razmaitych paštovak biare ŭpadabanuju. U Biełarusi tyja stendy źjavilisia niadaŭna i pakul što nie zdabyli jeŭrapiejskaj papularnaści dy ich prysutnaść abmiažoŭvajecca zbolšaha centralnymi kaviarniami stalicy.
