Parłamienckaja asambleja Rady Jeŭropy prypyniaje kantakty ź Biełaruśsiu na vysokim uzroŭni. Adpaviednaja rezalucyja pryniata 29 krasavika bolšaściu hałasoŭ na pasiadžeńni PARIE ŭ Strasburhu.
U hałasavańni ŭziali ŭdzieł 67 deputataŭ, 58 ź ich prahałasavali za pryniaćcie rezalucyi, šeść — suprać, try ŭstrymalisia (usiaho ŭ PARIE 318 deputataŭ).
U rezalucyi ŭkazvajecca na «niedastatkovy prahres» Biełarusi ŭ halinie adpaviednaści standartam Rada Jeŭropy. U pryvatnaści, u dakumiencie havorycca,
što ŭ krainie «ŭ atmaśfiery sakretnaści» byli pryviedzieny ŭ vykanańnie dva śmiarotnyja pryhavory, kali skarhi asudžanych razhladaŭ Kamitet AAN pa pravach čałavieka. Adznačajucca taksama vypadki parušeńnia ŭ Biełarusi pravoŭ polskaj nacyjanalnaj mienšaści i adsutnaść mižnarodnych naziralnikaŭ na vybarach u miascovyja saviety.
U dakumiencie vykazvajecca škadavańnie ŭ suviazi z «niedastatkovaj palityčnaj volaj biełaruskich uładaŭ raździalić kaštoŭnaści Rady Jeŭropy». Pry hetym u rezalucyi ŭtrymlivajecca zaklik pradoŭžyć dyjałoh ź Biełaruśsiu.
Jak raniej paviedamlałasia, rašeńnie ab praviadzieńni terminovych debataŭ pa situacyi ŭ Biełarusi było pryniata 26 krasavika na pasiadžeńni biuro PARIE.
***
Nahadajem, u sakaviku byli rasstralany 25-hadovy Andrej Žuk i 30-hadovy Vasil Juzepčuk. Pieršy byŭ pryznany vinavatym u razbojnym napadzie i zabojstvie supracoŭnikaŭ SVK «Balšavik-Ahra», jakija pieravozili hrošy dla vypłaty zarpłaty rabotnikam sielhaspradpryjemstva. Druhoha pryhavaryli da vyšejšaj miery pakarańnia za ŭčynieńnie sieryi zabojstvaŭ pažyłych žančyn u Bresckaj vobłaści.
Ab tym, što pryhavory pryviedzieny ŭ vykanańnie, stała viadoma ad maci Žuka. Tolki 2 krasavika ministr unutranych spraŭ Biełarusi Anatol Kulašoŭ paćvierdziŭ fakt pryviadzieńnia pryhavoraŭ u vykanańnie.
Kamitet AAN pa pravach čałavieka ŭ śpiecyjalnaj zajavie vykazaŭ abureńnie ŭ suviazi z pakarańniem śmierciu dvuch čałaviek, čyje skarhi znachodzilisia na razhladzie kamiteta.
Dziejańni biełaruskich uładaŭ asudzili kiraŭnictva Rady Jeŭropy, «Mižnarodnaja amnistyja», ajčynnyja pravaabaroncy.
Biełaruś — adzinaja kraina ŭ Jeŭropie, u jakoj dahetul prymianiajecca śmiarotnaja kara. U červieni 2009 hoda Parłamienckaja asambleja Rady Jeŭropy pryniała rezalucyju ab viartańni Biełarusi statusu śpiecyjalnaha zaprošanaha ŭ asamblei pry ŭmovie ŭviadzieńnia ŭ krainie maratoryja na pakarańnie śmierciu. Da ŭviadzieńnia maratoryja taksama zaklikaje Jeŭrasajuz. Heta adna z umoŭ admieny vizavych sankcyj u dačynieńni da biełaruskich čynoŭnikaŭ, jakija ES praciahnuŭ da kastryčnika 2010 hoda.
