Na čarhovym pasiadžeńni Rady intelihiencyi ŭdzielniki «kruhłaha stała» pa vyłučeńni adzinaha čatyry kandydata ŭ prezidenty ad demakratyčnych sił zaćvierdzili svaje «Papiarednija abaviazacielstvy». Kandydaty paabiacali, što buduć paźbiahać pravakacyjnych vykazvańniaŭ na adras adzin adnaho, a ŭ vypadku abrańnia «adzinym» zabiaśpiečać udzieł astatnich u svaim štabie.
«Abaviazacielstvy» ŭtrymlivajuć try asnoŭnyja punkty. Pieršyja dva rehłamientujuć pavodziny pretendentaŭ u pieryjad pracesu abrańnia «adzinaha» i ich abaviazki ŭ vybarčaj kampanii.
Tak, pretendenty paabiacali padčas pracy «kruhłaha stała» «ŭstrymlivacca ad kampramietacyjnych i pravakacyjnych vykazvańniaŭ na adras luboha ź jaho ŭdzielnikaŭ» i prykłaści «ŭsie namahańni dla dasiahnieńnia zhody na asnovie kansiensusa».
Druhim punktam jany śviedčać: «Kožny z nas harantuje, što ŭ vypadku abrańnia adzinym kandydatam jon, niahledziačy na supraćdziejańnie kiroŭnaha režyma i ryzyku dla siabie, zrobić usio mahčymaje dla pieramohi na prezidenckich vybarach, sfarmuje svoj vybarčy štab z ulikam rekamiendacyj usich udzielnikaŭ «kruhłaha stała» i zabiaśpiečyć ich udzieł u hetym štabie. Taksama kožny z nas harantuje, što ŭ vypadku abrańnia adzinym kandydatam inšaha pretendenta, uvojdzie ŭ jaho kamandu i zrobić padčas prezidenckaj kampanii ŭsio mahčymaje dla pieramohi demakratyčnych siłaŭ».
Treci punkt hetaha dakumienta rehłamientuje abaviazacielstvy kandydata ŭ vyniku jaho pieramohi. Tak, staŭšy prezidentam, jon pavinien:.
«1. Abaraniać niezaležnaść Biełarusi.
2. Inicyjavać paśladoŭnyja i apieratyŭnyja palityčnyja reformy z metaj ustalavańnia demakratyčnaj palityčnaj sistemy z realnym padziełam ułady i harantyjaj pravoŭ čałavieka; zabiaśpiečyć pryznačeńnie svabodnych parłamienckich vybaraŭ na šmatpartyjnaj asnovie nie paźniej jak praz čatyry miesiacy z dnia svajoj inaŭhuracyi.
3. Inicyjavać sistemnyja ekanamičnyja reformy dziela farmavańnia ŭ našaj krainie svabodnaj sacyjalnaj rynkavaj ekanomiki.
4. Inicyjavać naładžvańnie raŭnapraŭnaha ŭzajemavyhadnaha partniorstva Biełarusi ź inšymi krainami dziela dałučeńnia našaj krainy da siamji volnych jeŭrapiejskich narodaŭ.
5. Spryjać jak najbolš poŭnamu i abjektyŭnamu rasśledavańniu faktaŭ palityčnych źniknieńniaŭ palityčnych apanientaŭ papiaredniaha režymu.
6. Padtrymlivać nacyjanalnuju kulturu i biełaruskuju movu, spryjać farmavańniu ŭ biełaruskim hramadstvie niehatyŭnaha staŭleńnia da tatalitarnych ideałohij».
Praces padpisańnia hetaha dakumienta płanujecca zaviaršyć da kanca tydnia.
Svaje podpisy pad «Abaviazacielstvami» ŭžo pastavili čatyry kandydaty — Mikałaj Statkievič, Lavon Barščeŭski, Uładzimier Niaklajeŭ, Alaksandr Jarašuk, a taksama staršynia Rady biełaruskaj intelihiencyi Uładzimir Kołas.
Jak viadoma, u pracedury pad ehidaj Rady intelihiencyi nie biaruć udziełu Aleś Michalevič, Andrej Sańnikaŭ i Alaksandr Milinkievič.
