19 červienia, u dzień narodzinaŭ piśmieńnika, na jahonaj radzimie ŭ vioscy Byčki Ušackaha rajona na Viciebščynie adbudziecca ŭručeńnie premii «Za svabodu dumki».
Jana zasnavanaja lideram Ruchu «Za Svabodu» Alaksandram Milinkievičam. Uhanaravańnie budzie ładzicca ŭžo trecim razam. Uznaharoda źjaviłasia paśla taho, jak Milinkievič atrymaŭ adnajmiennuju premiju Jeŭraparłamienta «Za svabodu dumki» imia Andreja Sacharava.
Palityk skazaŭ, što jana jość uznaharodaj nie tolki jamu asabista, a i ŭsim tym, chto prajaŭlaje duch svabody. Tamu i źjaviŭsia biełaruski anałah sacharaŭskaj premii «Za svabodu dumki».
Taho, chto atrymaje hetuju premiju sioleta, vyznačyć žury ŭ składzie minułahodnich łaŭreataŭ — Ryhora Baradulina, Uładzimira Arłova, Paŭła Sieviarynca i Alesia Puškina.
Patrapić na radzimu Bykava ŭ hety dzień i ŭziać udzieł u cyrymonii ŭručeńnia premii «Za svabodu dumki» zmohuć try čałavieki, jakija chutčej za astatnich i najbolš słušna adkažuć na pytańni bykaŭskaj viktaryny. Aprača taho, jejnyja pieramožcy atrymajuć pryzy — ich uručeńnie taksama adbudziecca ŭ Byčkach.
Pytańni viktaryny:
1.
Anioł źjaviŭsia ŭ Biełarusi
Niečyść na ziamlu biadu naklikała.
Pieraharadziła bieły dzień hara.
Zastałasia Biełaruś biez Bykava — Biednaj chataj
Biez Haspadara.
Chto aŭtar hetaha vierša na śmierć piśmieńnika, datavanaha 22 červienia 2003 hoda?
2. Pieršaja asadka Bykava? (Pytańnie ad Ryhora Baradulina)
3. Pa jakim z tvoraŭ Bykava byŭ pastaŭleny balet?
4. Dzie ŭ Biełarusi jość vulica imia Vasila Bykava?
5. U jakim horadzie ciaham 30 hadoŭ da pierajezdu ŭ Minsk žyŭ Bykaŭ?
6. Jakuju premiju atrymaŭ Vasil Bykaŭ za apovieść «Znak biady»?
7. Jakuju miedyčnuju pryładu nasiŭ z saboj Bykaŭ i čamu?
8. Apošni horad, dzie žyŭ piśmieńnik na emihracyi?
9. Što ŭ jakaści premii za dobruju vučobu atrymaŭ Vasil Bykaŭ u školnyja hady?
10. Kali b nie niedachop hrošaŭ, Vasil Bykaŭ moh by atrymać śpiecyjalnaść… kaho? Pra što havorka?
11. Jak nazyvaŭsia pieršy apublikavany tvor Vasila Bykava ŭ 1947 hodzie ŭ časopisie «Vožyk»?
12. Jaki film, źniaty pa tvory Bykava, staŭ samym znakamitym?
13. Jakoha vieravyznańnia byŭ Vasil Bykaŭ?
14. Čamu kažuć, što Bykaŭ naradziŭsia dvojčy?
15. Kaho Bykaŭ nazyvaŭ svaim nastaŭnikam u litaratury?
16. Jaki vypadak na froncie staŭ asnovaj dla apovieści «Sotnikaŭ» i jak jana spačatku nazyvałasia?
Adkazy na pytańni adpraŭlajcie na elektronnuju skrynku [email protected] z paznakaj konkurs «Za svabodu dumki» da 18 červienia z paznakaj konkurs «Za svabodu dumki».
