Siońnia pačynajecca dvuchdzionny rabočy vizit u Biełaruś ministra zamiežnych spraŭ Rasii Siarhieja Łaŭrova.
Pavodle infarmacyi pres‑słužby biełaruskaha MZS, prahramaj vizitu praduhledžana sustreča Łaŭrova z kiraŭnikom źniešniepalityčnaha viedamstva Biełarusi Siarhiejem Martynavym. «Płanujecca abmierkavać šyrokaje koła pytańniaŭ biełaruska‑rasijskaha supracoŭnictva, uzajemadziejańnia ŭ miežach mižnarodnych arhanizacyj, abmianiacca dumkami pa mižnarodnym paradku dnia, jaki ŭjaŭlaje ŭzajemnuju cikavaść», — paviedamlaje pres‑słužba.
Baki majuć namier taksama abmierkavać pytańni praviadzieńnia sioleta ŭ Minsku sumiesnaha pasiadžeńnia kalehij ministerstvaŭ zamiežnych spraŭ Biełarusi i Rasii.
Varta zaznačyć, što 21 červienia zakončyŭsia termin piacidzionnaha ultymatumu, vyłučanaha «Hazpromam» Biełarusi ŭ suviazi z zapazyčanaściu za pastaŭki hazu. Siońnia ranicaj Dźmitryj Miadźviedzieŭ daručyŭ «Hazpromu» pačać abmiežavańnie pastavak hazu ŭ Biełaruś, praciahvajučy pry hetym kansultacyi ź Minskam pa ŭrehulavańni doŭhu ŭ 192 młn. dalaraŭ.
