ZŠA, 2010, kalarovy, 105 chv.
Režysior: Hary Ŭinik
Roli vykonvajuć: Amanda Sejfryd, Krystafer Ihan, Hael Harsia Bernal, Vanesa Redhrejv
Žanr: mieładrama, ramantyčnaja kamiedyja
Adznaka: 4 (z 10)
Zaručanaja ź Viktaram Safija jedzie ŭ Vieronu, horad Džuljety. Zanudziŭšysia na dziełavych sustrečach svajho žanicha, Safija znajomicca z «sakratarkami Džuljety», jakija adkazvajuć na luboŭnyja listy z usiaho śvietu. Na adzin taki zhubleny list, datavany 1951 hodam, adkazała j hierainia. Niečakana aŭtarka lista viartajecca ŭ Vieronu, kab znajści svajo pieršaje kachańnie. Razam ź joju pryhožy ŭnuk…
«Listy da Džuljety» Hary Ŭinika — sama piaščotny damski kič, jaki tolki možna sabie ŭjavić.Tut jość usio nieabchodnaje. Soniečnaja italjanskaja pryroda i ramantyčnaja muzyka, hutarki pra luboŭ i listy pra luboŭ, uzdychi ad raspoviedaŭ pra kachańnie — i lohkija ślozy.
Jość piekny Hael Harsija Bernal, jaki ścišyŭ svoj tempieramient dla damskaha ramanu — i jość Krystafer Ihan, saładžavaja kopija Hita Łedžera. Jość arystakratyčnaja Vanesa Redhrejv — z vačyma zanadta razumnymi dla prościeńkaj mieładramy.
Čaho niama ŭ hetaj marmieładnaj stužcy, dzie lepšaje zmahajecca z najlepšym, a cukiernaje — z najcukierniejšym, dyk heta — kanfliktaŭ.
Ale jany j niepatrebnyja damskim eratyčnym maram. Karcina dla 15-hadovych letucieńnic, jakija rychtujucca da žyćcia.
