25 červienia Kleckaja rajonnaja prakuratura vyniesła aficyjnaje papiaredžańnie Alehu Nikulinu, vydaŭcu chryścijanskaj haziety «Apostalski vietraź», jakaja vychodziła nakładam 299 asobnikaŭ. U tekście papiaredžańnia ŭkazana, što jon byccam by parušyŭ art.1 pp. 5, 26, art. 17, p. 1 i art. 32 Zakona ab ŚMI. Pavodle Aleha Nikulina, prakuror Aleh Karabkoŭ papiaredziŭ jaho, što vydańniem haziety, navat małanakładnaj, mohuć zajmacca vyklučna jurydyčnyja asoby.
Jak paviedamiŭ Aleh Nikulin, jamu patelefanavaŭ učastkovy milicyjant i zahadaŭ pryjści 25 červienia, a
Na minułym tydni da sp. Nikulina prychodziŭ milicyjant i braŭ ź jaho tłumačeńni adnosna vydavanaj im chryścijanskaj haziety «Apostalski vietraź». Taksama milicyjanty apytali probašča kleckaj parafii ks. Ervina Viačoraka, ci nie maje jon dačynieńnia da vydańnia.
«U svajoj haziecie ja aśviatlaŭ pytańni relihijnaha žyćcia. Pra palityku nie pisaŭ. Vychodnyja źviestki byli paznačanyja, nakład u miežach dazvolenaha zakanadaŭstvam — 299 asobnikaŭ», — paviedamiŭ Aleh Nikulin.
Prakuror Kleckaha rajona Aleh Karabkoŭ patłumačyŭ, što ŭ prakuraturu pastupiła zajava ad vykanaŭcy abaviazkaŭ staršyni rajvykankama Mikałaja Macula, u jakoj toj prosić pravieryć, ci nie źjaŭlajecca vydańnie dadzienaj hazety parušeńniem zakona.
U toj ža čas sp. Karabkoŭ paćvierdziŭ, što vychodnyja źviestki ŭ haziecie majucca, a pamier nakładu nie pieravyšaje dazvoleny zakanadaŭstvam. Tym nie mienš, prakuratura ŭsio roŭna vyrašyła apytać redaktara.
«Ni z taho ni ź siaho pačałosia vydańnie i raspaŭsiud haziety. My chočam pravieryć, chto dazvoliŭ heta rabić, i što ŭjaŭlaje saboj redakcyja, jakaja, pavodle vychodnych źviestak, znachodzicca ŭ domie, dzie pražyvaje Aleh Nikulin», — kaža prakuror.
Juryst Biełaruskaj asacyjacyi žurnalistaŭ Andrej Bastuniec patłumačyŭ, što ŭ adpaviednaści z Zakonam ab ŚMI, dadzienaje patrabavańnie nie raspaŭsiudžvajecca na vydańni, nakład jakich nie pieravyšaje 299 asobnikaŭ. «Heta vynikaje z analizu Zakona, jaki my praviali paśla taho, jak prakuratury ŭ niekalkich haradach vynosili anałahičnyja papiaredžańni» — kaža juryst.
