Lider kampanii «Havary praŭdu» idzie na vybary praz rehijony.
Fota Julii Daraškievič.
Paet jašče nie abvieściŭ ab svaich prezidenckich ambicyjach. «Ja nie adkažu vam ni «tak», ni «nie», — skazaŭ Uładzimir Niaklajeŭ nakont svajho mahčymaha ŭdziełu ŭ vybarach. Ale praź niejki čas užo zajaviŭ, što «pieratrusami ŭłady pastavili nas u palityčnaje pole». Tamu zastajecca čakać, kali paet vyrašycca sa zručnym momantam i ahučyć toje, što jamu tolki pakul prypisvali.
Užo ciapier svaimi dziejańniami
lider «Havary praŭdu» paŭtaraje pieradvybarčyja kroki Alaksandra Milinkieviča ŭ 2006 hodzie.
Hałoŭnaje padabienstva pamiž palitykami — staŭka na rehijony: pastajannyja sustrečy z nasielnictvam pa ŭsioj krainie.
Što da adzinaha, to pa pytańni vyznačeńnia hałoŭnaha kandydata artykulacyja ŭ palitykaŭ navat padobnaja.
Milinkievič u 2006 kazaŭ, «što niama adzinaha, a jość vosiem pretendentaŭ. Nu, adnaho adličym — siem, jakija nie majuć ułady siońnia. Nie źvinavačvajcie mianie ŭ niaścipłaści, ale ŭsio ž taki adziny pretendent — adzin. U tym sensie, što jon vysunuty absalutnaj bolšaściu arhanizavanych demakratyčnych struktur. Toje, što pajšli inšyja kandydaty, mianie zasmučvaje». Niaklajeŭ rastaviŭ takija samyja akcenty: «U pačatku kampanii nie miełasia na ŭvazie, što niechta ad «Havary praŭdu» abaviazkova pojdzie na prezidenckija vybary. Kali na vybary pojdzie dziesiać kandydataŭ, kali nie budzie adzinstva, to my budzie zmušanyja vyłučyć svajho kandydata». Faktyčna paet skazaŭ: «Havary praŭdu» idzie na vybary. I jon namiakaje, što nie suprać zaniać miesca adzinaha.
