Vydaviec kryčaŭskaj niedziaržaŭnaj hazety “Volny horad” Uładzimir Kudraŭcaŭ źviarnusia ŭ prakuraturu, kab taja raspačała kryminalnuju spravu suprać troch supracoŭnikaŭ rajonnaj milicyi.
U zajavie na imia prakurora Kryčaŭskaha rajonu Uładzimira Tryvajły Kudraŭcaŭ vinavacić staršych lejtenantaŭ Eduarda Kraŭcova, Siarhieja Mačulnaha, Juryja Dziubanava ŭ tym, što jany niezakonna aryštavali nakład apošniaha numara haziety. Akramia taho jon patrabuje, kab prakuratura ŭstanaviła asobu nieviadomaha supracoŭnika ŭ cyvilnym, jaki ŭdzielničaŭ u aryšcie kurjera haziety na vakzale rajcentru.
Niezakonny aryšt hazety Uładzimir Kudraŭcaŭ nazyvaje kradziažom jahonaj majomaści:
“Padstavaj dla učynienaha kradziažu z boku staršych lejtenantaŭ stalisia krytyčnyja materyjały pra dziejnaść rajonnaj milicyi. Takim čynam milicyjanty, jak adkaznyja asoby, pieraškodzili mnie ŭ majoj zakonnaj prafiesijnaj žurnalisckaj dziejnaści i pieraśledujuć mianie za krytyku”, -- zaznačaje ŭ zajavie vydaviec niedziaržaŭnaj haziety “Volny horad” Uładzimir Kudraŭcaŭ.
Hałoŭnaj temaj aryštavanaha numaru byŭ artykuł "NTV źniščyła reputacyju prezidenta Łukašenki” z kamientarom Paŭła Šaramieta pra skandalny film rasijskaj telekampanii “Chrosny baćka”.
Kurjera z 297 asobnikami "Volnaha horadu" aryštavali čaćviora milicyjantaŭ na kryčaŭskim aŭtavakzale 9 lipienia. Paźniej jaho vypuścili, ale haziety kanfiskavali. Vydaŭcy piśmova zapatrabavali ad prakurora i načalnika rajonnaj milicyi viarnuć aryštavany nakład haziety.
Niedziaržaŭnaja hazieta "Volny horad" drukujecca ŭ Smalensku. Vydańnie niezarehistravanaje. Pavodle biełaruskaha zakanadaŭstva, u takim statusie hazieta pavinna vychodzić nakładam, nie bolšym za 299 asobnikaŭ.
