Hutarka z sacyjołaham, kiraŭnikom daśledčyckaj łabaratoryi «Novak».
Fota Julii Daraškievič.
«Naša Niva»: Upłyŭ rasijskich telekanałaŭ na Biełarusi vialiki?
Andrej Vardamacki: Na samaj spravie vialiki i navat vielmi. Rejtynhi rasijskich telekanałaŭ bolšyja, čym biełaruskich. Ale varta zaznačyć, što rejtynhi telekanałaŭ składajucca ź niekalkich častak. Jość častka navinnaja, a jość zabaŭlalnaja, dzie pakazvajuć roznyja šou, kancerty, filmy. Dyk najbolšyja rejtynhi maje jakraz druhaja častka. Što datyčyć navin, to jany, jak praviła, pierakryvajucca biełaruskim praduktam. Tamu my nazirajem źmianšeńnie ŭpłyvu rasijskich navin na našu krainu. Jość jašče taki faktar, što ŭ asablivych vypadkach rasijskija naviny ci ich peŭnyja siužety prosta pierakryvajucca, nijakaj techničnaj ciažkaści ŭ hetym niama.
«NN»: A ci daviarajuć ludzi rasijskim telekanałam?
AV: Ja vam pryviadu peŭnyja ličby rejtynhaŭ pieradačaŭ navin. Najbolšy rejtynh maje rasijskaja pieradača «Vriemia» (telekanał ORT) — 22% (u Minsku) i 19% (pa krainie). Śledam iduć biełaruskija «Našy naviny» (ANT) — 20% i 17%. Prykładna adnolkavyja pazicyi ŭ «Viestiej» («Rośsija») i «Panaramy» (BT) — 3% i 4% adpaviedna. Rejtynh «24 hadzin» telekanała STV zaŭvažna mienšy — 1,2%. Možna havaryć pra toje, što situacyju ŭ Rasii biełaruskija hledačy viedajuć nie horš za biełaruskuju. A, naprykład, rasijskich palityčnych aktaraŭ viedajuć navat lepš za biełaruskich.
«NN»: Pakaz «Chrosnaha Baćki» na NTV adabjecca na rejtynhu Łukašenki?
AV: Možna ŭpeŭniena kazać, što heta adabjecca na rejtynhu Łukašenki ŭ Rasii. Što datyčyć Biełarusi, to film prahledzieła nie tak šmat ludziej. Zrešty, časta byvaje, što takija vypady dziejničajuć u procilehłym kirunku. Rejtynhi, naadvarot, mohuć nie źnizicca, a pavysicca. Jašče adnym z vyznačalnych momantaŭ moža być čas pakazu filma. Čamu jaho prademanstravali mienavita ciapier, kali viedali pra ŭsio heta raniej?
«NN»: Ci šmat biełarusaŭ viedaje pra spravy źnikłych? Jak usprymajuć hetyja zdareńni?
AV: Nie vielmi šmat. Ale hałoŭnaje navat nie heta. Samaje važnaje, jak hetyja źniknieńni ŭsprymajucca. A niejkaha pieražyvańnia jak ciažkaj i strašnaj rečy niama. Ludzi bolš zacikaŭlenyja pytańniami ŭłasnaha dabrabytu i rostam cenaŭ.
Andrej Vardamacki nar. 14 studzienia 1956 u pasiołku Džar-Kurhan (Uźbiekistan). Sacyjołah, fiłosaf. Kiraŭnik niezaležnaj łabaratoryi aksijamietryčnych daśledavańniaŭ «Novak». Skončyŭ Biełaruski dziaržaŭny ŭniviersitet, stažyravaŭsia ŭ Mičyhanskim univiersitecie (ZŠA). Kandydat fiłasofskich navuk, doktar sacyjałahičnych navuk, prafiesar
