Hałoŭnaje patrabavańnie akcyi 16 žniŭnia — raspačać mižnarodnaje rasśledavańnie spravaŭ źnikłych.
U apošnija tydni, u vyniku pieradač rasijskaha TV, jakija ŭskłali na vyšejšaje kiraŭnictva Biełarusi adkaznaść za źniknieńni viadomych ludziej u krainie, tema znoŭ aktualizavałasia. Na dumku arhanizataraŭ šeścia, ciapier samy čas znoŭ źviarnucca da mižnarodnych strukturaŭ z patrabavańniem nacisnuć na biełaruskija ŭłady dziela praviadzieńnia mižnarodnaha rasśledavańnia akaličnaściaŭ źniknieńnia Viktara Hančara, Juryja Zacharanki, Anatola Krasoŭskaha i Źmitra Zavadskaha
Arhanizatary spadziajucca atrymać dazvoł na praviadzieńnie akcyi, ale hatovyja da źmienaŭ maršrutu i farmatu mierapryjemstva, jak heta časta adbyvajecca ŭ našaj krainie. Pavodle arhanizataraŭ, šeście ŭ Minsku 16 žniŭnia moža stacca pieršym krokam da pavieličeńnia hramadskaj aktyŭnaści napiaredadni prezidenckaj vybarčaj kampanii.
«Na akcyju pryjduć ludzi, dla jakich tema źnikłych zastajecca važnaj, dziela ahučvańnia prablemaŭ, kab hetyja spravy byli rasśledavanyja», — ličyć Jaŭhien Afnahiel, suarhanizatar mierapryjemstva.
Razhortvańnie padziejaŭ padčas šeścia, miarkuje spadar Jaŭhien, bolš zaležyć ad haradskich uładaŭ, čym ad arhanizataraŭ.
Hetyja miesiacy — losavyznačalny čas dla našaj krainy. «Ciapier šmat ludziej niezadavoleny ŭładaju, ale šmat ludziej baicca vychodzić na vulicy, — miarkuje Jaŭhien Afnahiel. — Pieramieny, jakija mohuć adbycca ŭ našaj krainie, zaležać ad taho, ci pieraadolejuć ludzi strach pierad aktyŭnymi dziejańniami».
Zajaŭku na praviadzieńnie ŭ Minsku šeścia 16 žniŭnia pad łozunham «Patrabujem mižnarodnaha rasśledavańnia spravaŭ źnikłych» padali kiraŭnik minskaj arhanizacyi BNF Viktar Ivaškievič, hramadskija aktyvisty Jaŭhien Afnahiel, Pavał Juchnievič. Papiaredni zajaŭleny maršrut: Akademija navuk — płošča Svabody.
