Ale zastajecca pry kandydatury Rymašeŭskaha.
Jak pieradaje ahienctva BiełaPAN, u inicyjatyŭnuju hrupu pa zbory podpisaŭ za vyłučeńnie kandydatam u prezidenty Vitala Rymašeŭskaha zapisałasia prykładna tysiača čałaviek. Pra heta 7 žniŭnia na pasiadžeńni nacyjanalnaj rady arhkamiteta pa stvareńni partyi «Biełaruskaja chryścijanskaja demakratyja» (BCHD) paviedamiŭ sustaršynia arhkamiteta BCHD Pavieł Sieviaryniec.
Sieviaryniec adznačyŭ, što tysiača čałaviek — heta «niedastatkovaja kolkaść». «Inicyjatyŭnaja hrupa pavinna składać jak minimum dźvie z pałovaj tysiačy čałaviek. Tady my zmožam sabrać nieabchodnyja dla rehistracyi 100 tysiač podpisaŭ i pravieści sapraŭdy efiektyŭnuju pieradvybarnuju kampaniju», — zajaviŭ Sieviaryniec.
Vystupajučy pierad členami rady, Vital Rymašeŭski adznačyŭ, što padčas pajezdki pa rehijonach ubačyŭ «vielmi słabuju dla prezidenckaj kampanii partyju». «Rehijanalnyja lidery, i nie tolki z našaj partyi, dezaryjentavany. Tyja, chto krytykavaŭ mianie padčas sustreč, paśla hetych sustreč padychodzili da mianie i havaryli, što mohuć dapamahčy za „nievialiki hanarar“. Jany stracili vieru ŭ toje, što možna štości źmianić, i chočuć prosta zarabić hrošaj. Ale jość i inšyja prykłady. U adnym z rajonaŭ u maju inicyjatyŭnuju hrupu zapisałasia poŭnaściu arhanizacyja Abjadnanaj hramadzianskaj partyi. Prosta im nie padabajecca toje, što kandydat ad AHP prapanuje lehalizavać prastytucyju, a naša prahrama im padychodzić bolš», — skazaŭ Rymašeŭski.
Jon zaklikaŭ prysutnych aktyvizavać pracu ŭ rehijonach.
BiełaPAN paviedamlaje taksama, što Nacyjanalnaja rada BCHD zaćvierdziła tezisy pieradvybarnaj prahramy svajho pretendenta.
U tezisach prahramy — refarmavańnie sistemy ŭłady, vybarnaść kiraŭnikoŭ haradoŭ i viosak, nadańnie bolšych paŭnamoctvaŭ orhanam miascovaha samakiravańnia i administracyjnaja reforma. Na dumku BCHD, kiravańnie krainaj budzie bolš efiektyŭnym, kali Biełaruś budzie padzielena nie na šeść abłaściej, a na 23 rehijony.
U jakaści baraćby z karupcyjaj BCHD prapanuje źmienšyć kolkaść dziaržaŭnych čynoŭnikaŭ u try razy. Akramia taho, prapanujecca ŭvieści «zakon Linkalna»: toj, chto dakaža fakt karupcyi, atrymlivaje 25% ad vyjaŭlenaha. Akramia taho, BCHD vystupaje za pryncyp «adnaŭlenčaha pravasudździa»: stavić akcent nie na pakarańnie, a na kampiensacyju škody i prymireńnie bakoŭ.
U pieradvybarnych tezisach Rymašeŭskaha — pryniaćcie novaha zakona ab svabodzie vieravyznańnia z udziełam u hetym pracesie pradstaŭnikoŭ usich kanfiesij, viartańnie viernikam usich śviatyń, adabranych u kamunistyčnyja časy, uviadzieńnie padatkovych ilhot cerkvam.
Tezisy prahramy praduhledžvajuć sacyjalnyja harantyi sirotam, piensijanieram, invalidam i małamajomnym. Asablivuju ŭvahu płanujecca nadavać pieraadoleńniu nastupstvaŭ katastrofy na Čarnobylskaj AES, adukacyi, navucy i achovie zdaroŭja.
U adnosinach z Rasijaj i Jeŭropaj praduhledžany «ŭzajemavyhadnyja siabroŭskija adnosiny». «Biełaruś — niejtralnaja kraina (nijakich NATO i ADKB).Biełarusi patrebna jeŭrapiejskaja ekanomika, zasnavanaja na navuka- i pracajomistaj vytvorčaści, tranzicie, servisie, turystyčnym biźniesie, infarmacyjnych i ekałahičnych technałohijach», — havorycca ŭ tezisach prahramy Rymašeŭskaha.
Adnačasova BCHD zajaviła pra hatoŭnaść da novych pieramovaŭ ź inšymi kandydatami, blizkimi pa kaštoŭnaściach.