8 vieraśnia spoŭniłasia 50 hod namieśniku staršyni Biełaruskaha sajuza mastakoŭ Sieržuku Cimochavu.
Cimochaŭ naradziŭsia ŭ 1960 hodzie ŭ vioscy Krotaŭ Kalinkavickaha rajona Homielskaj vobłaści. Paśla zakančeńnia Minskaha mastackaha vučylišča imia Alaksieja Hlebava i Biełaruskaj dziaržaŭnaj akademii mastactvaŭ pracavaŭ u Homielskim i Viciebskim mastackich kambinatach. Z 1989 hoda — hałoŭny mastak Połacka (Viciebskaja vobłaść), z 1992 hoda — zasnavalnik i dyrektar połackaj halerei «Rysa».
Jak adznačajuć mastactvaznaŭcy, u svaich tvorach Cimochaŭ imkniecca ŭvasobić pieršaasnovy byćcia biełarusaŭ, ich jazyčnickija tradycyi, fantasmahoryi i kasmahanizm praź simvaličnaść źmiestu i formy, suraźmiernaść fakturnaści, vyjaŭlenčaści i abstrahavanaj umoŭnaści, žyvapisnaść i tonkija koleravyja spałučeńni. Mastak pracuje ŭ stankovym žyvapisie i hraficy,
U intervju BiełaPAN pieršy namieśnik staršyni BSM Ryhor Sitnica nazvaŭ Cimochava «adnym ź lidaraŭ sučasnaha biełaruskaha vyjaŭlenčaha mastactva, vielmi jarkim mastakom sa svaim aŭtarskim paznavalnym stylem, što i adroźnivaje mastaka ad ramieśnika». «Pavodle słoŭ Sitnicy, hety styl uhruntavany mienavita na nacyjanalnych tradycyjach, na mocnaj akademičnaj prafiesijnaj škole. «Razam z tym Cimochaŭ ubiraje ŭ siabie mastacki dośvied usiaho śvietu, što daje vielmi niečakany, jarki i vysakajakasny mastacki vynik», — padkreśliŭ Sitnica. Pavodle jaho słoŭ, jubilar — heta čałaviek, jaki nietaropka, pastupova, vielmi ŭpeŭniena i hruntoŭna padymaje siabie pa leśvicy mastackaj daskanałaści.
«Ja lublu ŭsio, što jon robić, ź vialikim zachapleńniem sustrakaju kožny jaho novy tvor i zaŭsiody čakaju adkryćciaŭ i pryjemnaj niečakanaści. Tym bolš, što my ź im ziemlaki — palešuki i adnadumcy ŭ hramadskich, mastackich i maralnych aryjencirach», — skazaŭ Sitnica.
Jon nazvaŭ Cimochava «vydatnym arhanizataram», jaki prajaviŭ svaje zdolnaści i ŭ kiraŭnictvie BSM.