Akcyja salidarnaści, jakaja 16‑ha dnia kožnaha miesiaca pravodziłasia na Kastryčnickaj płoščy, u čaćvier projdzie kala kaścioła śviatoha Jazepa. Ad taho dnia hramadskija aktyvisty buduć źbiracca štoviečar a 19‑j hadzinie.
Pačynajučy z 16 vieraśnia, akcyi za viartańnie kaścioła śviatoha Jazepa buduć adbyvacca štodzionna. Pra heta zajaviŭ Pavał Sieviaryniec na presavaj kanfierencyi, jakaja adbyłasia 13 vieraśnia prosta na prystupkach zabranaj śviatyni, što znachodzicca ŭ centry Miensku. Akramia lidera BCHD, na presavaj kanfierencyi vystupili kiraŭnik «Maładoha Frontu» Źmicier Daškievič i moładzievy lider Franak Viačorka.
Na dumku Paŭła Sieviarynca, damahacca viartańnia kaścioła patrebna mienavita zaraz, bo ŭ pieradvybarčy pieryjad jość mahčymaść paŭpłyvać na dziejańni ŭładaŭ.
Taksama, jak adznačyŭ Pavał Sieviaryniec, 15 vieraśnia BCHD płanuje pieradać u administracyju Łukašenki, pałatu pradstaŭnikoŭ i Apostalskuju Nuncyjaturu zvarot z patrabavańniem pieradać kaścioł viernikam, padpisany niekalkimi tysiačami čałaviek.
Vierniki, hramadskaść, katalickija ijerarchi nieadnojčy ŭzdymali pytańnie viartańnia kaścioła śviatoha Jazepa pierad uładami. Piać hadoŭ štodnia adbyvajucca malitvy za viartańnie kaścioła. Adnak ułady nie śpiašajucca pieradavać chram viernikam. Naadvarot, zhodna z płanami Minharvykankama, musić być prystasavany pad haściničny kompleks i abjekty handlova‑pobytavaha pryznačeńnia.
