U śledčym adździele mahiloŭskaj milicyi ŭ čaćvier dapytali kiraŭnika dabračynnaha fondu «Ščyraść» Ihara Kavalenku. Jak jon kaža, dopyt vioŭ mienski śledčy Dzianis Dyščanka.
Ciaham dźviuch hadzinaŭ milicyjant zadavaŭ jamu bolš jak dziasiatak pytańniaŭ pra stasunki z ustanovaj «Ruch napierad», jakuju ačolvaje lider hramadzianskaj kampanii «Havary praŭdu» Ŭładzimier Niaklajeŭ.
Kavalenka: «Dopyt milicyjant arhumentavaŭ raśśledavańniem kryminalnaj spravy suprać kiraŭnika adnoj z palihrafičnych kampanijaŭ Biełarusi. U hetaj spravie Niaklajeŭ prachodzić jak padazrony. Usie pytańni byli źviazanyja ź finansavym bokam našych uzajemaadnosinaŭ. Jaho cikaviła, jak apłačvaŭ Niaklajeŭ vydatki, źviazanyja z svaimi nieadnarazovymi vizytami ŭ Mahiloŭ. Jak finansavalisia „Rucham napierad“ akcyi, jakija pravodzilisia ŭ Mahilovie. Ci atrymlivaŭ ja asabista hrošy za ich. Mnie naahuł nie byli zrazumiełymi takija pytańni, bo padčas pieratrusu 18 traŭnia milicyjanty kanfiskavali damovy majoj arhanizacyi z „Rucham napierad“. U ich usio było raśpisana. Praŭda, hrošaj ja nie atrymaŭ, bo nia vykanaŭ
Sa słoŭ Kavalenki, milicyjant paabiacaŭ, što nieŭzabavie jahonaj arhanizacyi viernuć častku kanfiskavanych 18 traŭnia rečaŭ. Pry hetym jon nie kankretyzavaŭ, jakija mienavita. Tady ŭ fondu kanfiskavali drukavanuju pradukcyju, elektronnyja nośbity infarmacyi, u tym liku bloki pamiaci dvuch kamputaraŭ, a taksama dakumentacyju arhanizacyi.
27 vieraśnia toj ža Dzianis Dyščanka dapytvaŭ u Babrujsku siamju aktyvistki «Havary praŭdu» Aleny Miadźviedzievaj.
Tym razam jahonyja pytańni taksama tyčylisia finansavańnia akcyjaŭ «Havary praŭdu», jakija pravodzilisia ŭ Babrujsku.
Biaz pozvy na dopyt admaŭlajecca iści mahiloŭski aktyvist «Havary praŭdu» Siarhiej Łapucin.
