Staršynia Tavarystva achovy pomnikaŭ Anton Astapovič: «Pracy viaducca niezakonna».
Tak carkva Barysa i Hleba vyhladała da rekanstrukcyi. Fota Źmitra Michnieviča.
U červieni 2010 h. kala carkvy źjavilisia «cybuliny». Fota Źmitra Rahačova.
U listapadzie 2010 h. «cybuliny» pačali ŭstaloŭvać. Fota pomniki.budzma.org.
U listapadzie 2010 h. «cybuliny» pačali ŭstaloŭvać. Fota pomniki.budzma.org.
Na minułym tydni ŭ Navahrudku na carkvie Barysa i Hleba, pomniku architektury CHII st., pačali ŭstaloŭvać pazałočanyja cybulepadobnyja kupały. U pracesie ŭstalavańnia «cybulin» demantujucca šatrovyja zaviaršeńni viežaŭ carkvy.
U suviazi z hetym staršynia Tavarystva achovy pomnikaŭ Anton Astapovič źviarnuŭsia ź listom u Ministerstva kultury z prośbaj spynić pracy ŭ Navahrudku, paviedamlaje BiełaPAN. Jon prosić raspačać u adnosinach da prychodu carkvy i adkaznych supracoŭnikaŭ Navahrudskaha rajvykankamu administracyjnuju spravu. Akramia taho, A. Astapovič źviarnuŭsia ŭ navahrudskuju prakuraturu.
Pracy pa rekanstrukcyi pačalisia ŭ červieni hetaha hoda i vyklikali skandał. Anton Astapovič źviarnuŭsia tady da navahrudskich uładaŭ z patrabavańniem spynić rekanstrukcyju Barysahlebskaj carkvy. Spasyłajučysia na Ihara Čarniaŭskaha, staršyniu ŭpraŭleńni Ministerstva kultury pa achovie historyka-kulturnaj spadčyny, Astapovič zajaviŭ ŭ červieni, što rekanstrukcyja viežaŭ carkvy nie ŭzhodnienaja ź Ministerstvam kultury. Nastajaciel carkvy ajciec Mikałaj Orsa na heta zajaviŭ, što dazvoł atrymaŭ.
Za chram zastupilisia intelektuały. Zvarot da Biełaruskaha Ekzarchatu Rasiejskaj Pravasłaŭnaj Carkvy i Ministertva kultury padpisali fiłosafy Aleś Ancipienka i Valancin Akudovič, architektarka Irena Łaŭroŭskaja, mastactvaznaŭcy Siarhiej Chareŭski i Maksim Žbankoŭ.
Na situacyju vakoł pomnika architektury adreahavała Ministerstva kultury. Upraŭleńnie pa achovie historyka-kulturnaj spadčyny i restaŭracyi ministerstva padrychtavała pradpisańnie pa viadzieńni restaŭracyjnych pracaŭ u Navahrudku i dasłała jaho kopiju ŭ Navahrudski rajvykankam. U hutracy z NN načalnik upraŭleńnia Ihar Čarniaŭski tady tak i nie raskryŭ detali pradpisańnia: «A ci buduć tyja cybuliny, ci nie buduć, stanie jasna paśla kančatkovaj padrychtoŭki prajektu».
Jak paviedamili NN z Navahrudka, nastajaciel carkvy abviaściŭ prychadžanam, što pierad ustalavańniem novych kupałoŭ možna ŭkłaści ŭ ich paminalnyja cydułki. Dać takuju cydułku kaštavała 10 tysiač rubloŭ.
«Naša Niva» budzie sačyć za raźvićciom padziej u Navahrudku.
***
Carkva Sv. Barysa i Hleba — pomnik architektury suśvietnaha značeńnia. Zbudavanaja ŭ 1517–19 na miescy staražytnaha chrama CHII st. Fundatar — hietman VKŁ kniaź Kanstancin Astrožski. Pomnik architektury ŭjaŭlaje saboj simbijoz hatyčnaha i reniesansnaha stylaŭ z rysami abarončaha dojlidstva. U 1873–75 chram pierabudavali ŭ psieŭdaruskim styli, paśla jamu viarnuli raniejšy vyhlad. Paśla Druhoj suśvietnaj vajny carkva nie funkcyjanavała, słužby adnavilisia ŭ 1990-ja.
