Stvaralniki psieŭdadakumientalnych kamiedyj «Borat» i «Bruna» rychtujuć nastupny prajekt — film režysiora Łary Čarłza i aktora Sašy Barona Koena budzie nazyvacca «Dyktatar».
Jak pieradaje NEWSru.com, vytvorčaściu filma zojmiecca studyja Paramount, jakaja zavajavała farsavaha aktora fokusam całkam u jaho duchu: u jaho ahienctva adpravili dvuch kazłoŭ, apranutych u majki z łahatypam kampanii. Pa zabaŭnym supadzieńni, adnym ź piersanažaŭ, jakich zhraje Koen u «Dyktatary», budzie jakraz kazłapas.
Inšaj rolaj komika ŭ hetym filmie budzie zrynuty dyktatar, jaki zhubiŭsia ŭ čužoj krainie. Abiedźvie historyi buduć raźvivacca paralelna.
Inšych padrabiaznaściaŭ pra siužet filma pakul nie paviedamlajecca, viadoma tolki, što jon budzie ŭ značna bolšaj stupieni pabudavany na kłasičnych scenarnych pryncypach, čym papiarednija karciny, dzie pieravažała interaktyŭnaść.
U napisańni scenaru ŭziaŭ aktyŭny ŭdzieł sam Koen, zdymki płanujecca pačać adrazu paśla zakančeńnia pracy aktora nad «Vynachodnictvam Chjuha Kabre» (The Invention of Hugo Cabret) Marcina Skarseze.
U vieraśni hetaha hoda taksama stała viadoma, što Saša Baron Koen zaćvierdžany na rolu Fredzi Merkjury ŭ bajopiku znakamitaha muzykanta. Zdymki filma pačnucca ŭ 2011 hodzie.
