Detektyŭ pra tak zvany jubilejny samit SND siońnia atrymaŭ praciah. Jak vynikaje z vykazvańniaŭ rasiejskaha ambasadara, mierapryjemstva rasščepiać na dva. Pryčym Miensku — aby što, a viarški źližuć inšyja!
Nahadaju fabułu: ajčynnaje načalstva z pačatku hoda rychtavałasia da vyjhryšnaj pijar-akcyi — forumu ŭ honar 15-hodździa SND. Chaj sabie jubilej sumnieŭny, ale ž dobraja padstava prezentavać Miensk jak kipučy asiarodak mižnarodnaha žyćcia!
I voś paśla žorstkaha vystupu Alaksandra Łukašenki 29 vieraśnia (teza: darahi haz — razryŭ stasunkaŭ) Kreml spačatku adsunuŭ samit, a potym puściŭ pahałosku, što novym jahonym miescam budzie Astana (ci Ałmaty).
Siarod naviednikaŭ błohu navat usčałasia dyskusija, ci pojdzie Kreml na takuju abrazu pačućciaŭ biełaruskaha chaŭruśnika.
Jak bačym, niama dymu biez ahniu. Ź infarmacyi ambasadara Surykava vynikaje, što Maskva sapraŭdy padniesła pilulu, ale razam z tym dała tutejšamu kiraŭnictvu mahčymaść vyratavać tvar pierad naiŭnaj častkaj elektaratu.
"Kali heta i aplavucha, to elehantnaja", — zaznačyŭ znajomy palitolah.
U nas, takim čynam, projdzie pracoŭny forum z apryjory biasplonnaj dyskusijaj pra refarmavańnie-vyratavańnie SND. Status pracoŭnaha padrazaje pad korań prapahandysckija plany haspadaroŭ. Pompa vyhladała b užo prosta anekdatyčna.
A viarški zdymie Nazarbajeŭ. Jašče ź siaredziny 90-ch jon žorstka supierničaŭ z Łukašenkam za laŭry hałoŭnaha postsavieckaha intehratara. I voś — padstava dla tryumfu: mienavita jubileić buduć u Kazachstanie.
Cikava, ci palacić tudy Łukašenka?
