30 listapada ŭ dziaržaŭnych ŚMI, u pryvatnaści ŭ haziecie «Minskij kuŕjer», apublikavana pieradvybarnaja prahrama kandydata ŭ prezidenty Biełarusi Jarasłava Ramančuka.
Palityk pieraličvaje piać kaštoŭnaściaŭ, jakija «farmirujuć mocny fundamient» jaho prahramy:
— svaboda vybaru kožnaha čałavieka;
— adkaznaść kožnaha čynoŭnika;
— padtrymka kožnaha čałavieka ŭ biadzie;
— salidarnaść nacyjanalnych vytvorcaŭ i spažyŭcoŭ;
— partniorstva biźniesu i ŭłady, hramadzianskaj supolnaści i dziaržavy.
Siarod pryjarytetaŭ stvareńnia «novaj Biełarusi» Ramančuk nazyvaje:
— vialikaje hramadstva. «Heta aktyŭny ŭdzieł hramadzian u pryniaćci rašeńniaŭ palitykami i čynoŭnikami. Vialikaje hramadstva — heta kłopat ab zdaroŭi čałavieka i prajaŭleńnie salidarnaści z sacyjalna nieabaronienymi. Usie palityki va ŭładzie buduć vybiracca, a nie pryznačacca. 70% dziaržaŭnaha biudžetu budzie tracicca na miascovym uzroŭni. Kampanii, jakija finansujuć hramadskija arhanizacyi, atrymajuć padatkovyja lhoty. Budzie likvidavana cenzura ŚMI, harantavana svaboda słova i suvierenitet interneta»;
— sumlennaja dziaržava. «Na praciahu hoda paśla prezidenckich vybaraŭ my praviadziem kanstytucyjny refierendum. U Biełarusi budzie abrany paŭnacenny parłamient, harantavana niezaležnaść i efiektyŭnaść suda. Kiraŭniki haradoŭ i rajonaŭ buduć abiracca, a nie pryznačacca. Demakratyčnyja vybary ŭ parłamient i ŭsie miascovyja orhany ŭłady projduć viasnoj 2012 hoda. ŚMI stanuć paŭnacennaj čaćviortaj uładaj. Usie orhany dziaržavy vyjduć sa składu zasnavalnikaŭ kamiercyjnych arhanizacyj. Dziaržaŭnaj majomaściu budzie kiravać Ministerstva pa dziaržaŭnaj majomaści i pryvatyzacyi. Budzie ŭviedziena zabarona na zasnavańnie orhanami dziaržkiravańnia novych kamiercyjnych struktur»;
— pryvatnaja ekanomika. «Biełaruś stanie adnym ź lepšych miescaŭ dla pradprymalnictva ŭ Jeŭropie. Na pieršym etapie staŭka PDK budzie źnižana da 15%. Budzie ŭviedziena adzinaja mytnaja pošlina na ŭsie impartnyja tavary ŭ pamiery 3%. U novym zakonie ab biudžecie zamiest 30 padatkaŭ i zboraŭ u krainie buduć tolki try: padatak z roźničnych prodažaŭ tavaraŭ i pasłuh (20%), adziny sacyjalny padatak (15%) i akcyzy. Padatkovyja zbory nie buduć pieravyšać 30% VUP. Za košt spraščeńnia sistemy spravazdačnaści na rukach u biźniesu kožny hod buduć zastavacca bolš za 3 młrd. dołaraŭ»;
— novyja pracoŭnyja miescy. «Za 2011–2013 hady ŭ Biełarusi budzie stvorany miljon novych pracoŭnych miescaŭ. Jany buduć stvaracca biełaruskimi pradprymalnikami, małym biźniesam u partniorstvie z zamiežnymi inviestarami. Da 2014 hoda ŭ krainu budzie pryciahnuta da 20 młrd. dołaraŭ pramych zamiežnych inviestycyj. Ź cieniavoj ekanomiki vyjduć kala 8 młrd. dołaraŭ. Hrošy na reformy źjaviacca taksama za košt uklučeńnia ŭ kamiercyjny abarot ziamli, raźniavoleńnia pradprymalnikaŭ i tvorčaha patencyjału biełarusaŭ»;
— adkrytaja kraina. «Hałoŭny pryncyp novaj źniešniaj palityki Biełarusi — „Siabravać z usimi!“ My adnovim dobrasusiedskija, partniorskija adnosiny z Rasijaj. Budzie stvorana paŭnacennaja zona svabodnaha handlu. Dziaržaŭnaja miaža pierastanie być karmuškaj dla kantrabandystaŭ i aliharchaŭ. My zachavajem biaźvizavy režym z Rasijaj, aktyvizujem inviestycyjnyja i handlovyja suviazi. Budzie stvorana paŭnacennaja zona svabodnaha handlu z Ukrainaj. Da 2013 hoda Biełaruś vykanaje ŭsie patrabavańni Suśvietnaj handlovaj arhanizacyi (SHA) i stanie jaje členam. U 2011 hodzie my ŭviadziem maratoryj na śmiarotnuju karu. Naša kraina stanie členam Savieta Jeŭropy. Da 2013 hoda Biełaruś atrymaje ad Jeŭrapiejskaha sajuza status krainy z rynačnaj ekanomikaj i stvoryć ź ES zonu svabodnaha handlu. U 2011 hodzie my admienim vizy dla hramadzian krain ES, ZŠA, Kanady, Japonii i Paŭdniovaj Karei. Biełaruś realizuje dahavory ab biaźvizavym pryhraničnym pieramiaščeńni hramadzian ź Litvoj i Polščaj».
Aprača taho, Ramančuk abiacaje madernizavać sistemu adukacyi ŭ adpaviednaści sa standartami Bałonskaha pracesu i, jak vynik hetaha, pryznańnie biełaruskich dypłomaŭ u Jeŭropie.
U Biełarusi budzie raźvivacca sučasnaje infarmacyjnaje hramadstva. «My zabiaśpiečym vysakachutkasny dostup da interneta ŭ kožnuju škołu, univiersitet i biblijateku. U siaredniaj škole buduć vyvučacca dźvie zamiežnyja movy. Biełaruskaja nacyjanalnaja kultura ŭzbahacić jeŭrapiejskuju i stanie jaje nieadjemnaj častkaj», — zaznačajecca ŭ prahramie.
