Dapamahać jamu ŭ hetym budzie Murmanski kamitet sałdackich maci.
Nahadajem, 1 listapada ŭ Murmansku byŭ aryštavany biehły sałdat biełaruskaj armii Alaksandr Trubnikaŭ. U dadzieny momant biełaruski bok čakaje ad Hienieralnaj prakuratury Rasii dazvołu na ekstradycyju. Adpaviednyja dakumienty taksama padrychtavała prakuratura Murmanskaj vobłaści. U vypadku, kali vina sałdata budzie dakazanaja, Trubnikavu pahražaje ad 2 da 7 hadoŭ pazbaŭleńnia voli.
Adnak, pradstaŭnik arhanizacyi sałdackich maci Murmanska Iryna Pajkačava ličyć, što sprava patrabuje bolš detalovaj prapracoŭki: «My nieadnarazova naviedvali Trubnikava ŭ SIZA. Jak vyśvietliłasia, za čas słužby małady čałaviek paśpieŭ źmianić 4 voinskich čaściej. U dvuch ź ich Trubnikaŭ sutykaŭsia ź niestatutnymi adnosinami z boku starasłužačych. Umovy słužby taksama byli nie sumiaščalnyja z stanam jaho zdaroŭja — paviedamiŭ sam Trubnikaŭ. Na naš pohlad, jaho ŭcioki z častki mieli pad saboj vielmi važkija padstavy i Rasija pavinna padać Trubnikavu prytułak, a nie vydavać Minsku».
Razam ź biełaruskimi kalehami z «Kampanii za AHS ŭ Biełarusi» pravaabaroncy majuć namier pieraškodzić vydačy Trubnikava Biełarusi, sadziejničać pradastaŭleńniu jamu prystanišča.
«Vydać Trubnikava Biełarusi — faktyčna złamać chłopcu žyćcio. Uciok z častki jon nie ad dobraha žyćcia. Sam fakt taho, što jamu zastavałasia słužyć ŭsiaho 52 dnia, ale jon źbieh, havoryć pra mnohaje — chłopiec prosta nie moh dalej tryvać takoj słužby. Vypadki niestatutnych adnosinaŭ, što hetak staranna chavajucca Ministerstvam abarony, usio čaściej vychodziać na pavierchniu. My ličym, što jon źbieh vyklučna dziela zachavańnia ŭłasnaha zdaroŭja, honaru i hodnaści. Heta vina armii, što jana nie mahła zabiaśpiečyć zachavańnie jaho zdaroŭja i pravoŭ naležnym čynam», — ličyć Michaił Paškievič, kaardynatar «Kampanii za AHS ŭ Biełarusi».
Alaksandr Trubnikaŭ byŭ pryzvany na terminovuju vajennuju słužbu Partyzanskim rajonnym vajennym kamisaryjatam Minska ŭ studzieni 2009 hoda. u adnoj z voinskich čaściej u Minskim rajonie. U kancy maja 2010 hoda, znachodziačysia ŭ sutačnym naradzie pa stałovaj, małady čałaviek samavolna pakinuŭ terytoryju čaści i ŭciok. Pa hetym fakcie pravaachoŭnymi orhanami Biełarusi była raspačata sprava na padstavie č. 1 art. 446 Kryminalnaha kodeksa, vajennasłužačy abjaŭleny ŭ vyšuk. A. Trubnikaŭ źjechaŭ u Rasiju, u Murmansk da svajakoŭ.
Paśla jaho zatrymańnia ad namieśnika hienprakurora Biełarusi na imia hienprakurora Rasii pastupiła chadajnictva ab vydačy Trubnikava dla pryciahnieńnia da kryminalnaj adkaznaści za deziercirstva.
