Hišpanskija žurnalisty vykapali sakretnuju stratehiju Eŭraźviazu litaralna sa śmiećcia. Pra heta piša "Kommiersant'". Niaŭžo spraŭdzilisia słovy asobnych našych radykalnych krytykaŭ, jakija daŭno davodzili, što bruselskija kancepcyi varta vykinuć na pamyjku? :))
Nasamreč sakretnyja papiery trapili ŭ śmiećcievy bak praz elementarnuju niadbajnaść persanału hišpanskaha MZS. Niama na ich dyrektyvy №1!
Takim čynam, šyrokaj hramadzskaści stała viadoma, jak eŭrapiejskija lidery damaŭlalisia pierad samitam u Łachci ŭziać za harlak Pucina, zakinuŭšy jamu enerhietyčny dyktat, parušeńni pravoŭ čałavieka i h.d. U vyniku ž — natrapiła kasa na kamień.
Pryblizna toje samaje nazirajecca i ŭ biełaruskim pytańni. Peryjadyčna Eŭropa apeluje da Kramla z zaklikami paŭpłyvać na biełaruskaha chaŭruśnika, ale… Pra efekt vy sami dabra viedajecie.
Vypadkova raskrytyja tajamnicy pakazvajuć, zvyš usiaho, što "adzinaja Eŭropa" nasamreč nie takaja ŭžo adzinaja. Heta piaresty kanhlamerat, u jakim isnujuć vialikija supiarečnaści. U pryvatnaści, miž starymi i novymi siabrami.
Zaŭvažcie: jak vynikaje z sakretnaha pratakołu, abaranić Hruziju ad Maskvy najbolej horača zaklikali prezydent Polščy Lech Kačyński dy Andrus Ansip z Estonii. Prezydent Litvy Adamkus taksama byŭ u liku prychilnikaŭ bolej žorstkaj linii ŭ dačynieńni da Kramla.
Heta i nia dziŭna, bo va ŭsich zhadanych krainach jašče nie zabylisia pra abdymki rasiejskaha miadźviedzia.
A voś pradstaŭniki staroj Eŭropy ŭsialak achaładžali impet "haračaha estonskaha chłopca" dy inšych uschodnieeŭrapiejcaŭ. Maŭlaŭ, treba bolej łahodnaści, kampramisnaści…
Ci varta dzivicca, što ŭ Brusela faktyčna niama vyraznaj adzinaj stratehii i ŭ biełaruskim pytańni? A toje, što sprabujuć vydać za kanceptualny padychod, elementarna nie spracoŭvaje.
Dyj ŭvohule — im tam staje tłumu i biaz nas. Tak što apazycyjnyja medyi, jakija malujuć sytuacyju tak, nibyta ŭ Eŭropy tolki i balić hałava pra los demakratyi ŭ našaj krainie, — troški hiperbalizujuć. Mnohim zachodnim prahmatykam zusim nia mulaje status-kvo, kali "dziaržava Łukašenki" zbolšaha zabiaśpiečvaje patreby tranzytu dy tarmozić nielehałaŭ.
Ale hodzie kidać kamiani ŭ sytych biurheraŭ! Ci karektna kazać, što jany zamała ščyrujuć dziela demakratyčnych ideałaŭ? Ci jość maralnaje prava patrabavać, kab Eŭropa zmahałasia za ich bolej rašuča dy samaachviarna, čym samo biełaruskaje hramadztva?