Inicyjatyva svajakoŭ biełaruskich palitźniavolenych «Vyzvaleńnie» źviarnułasia da papy rymskaha Bieniedykta XVI z prośbaj padtrymać nievinavatych hramadzian, jakija znachodziacca za kratami, malitvaj i dapamahčy ŭ vyzvaleńni ich z turmaŭ.
U zvarocie havorycca, što noč z 19 na 20 śniežnia stała dla biełarusaŭ «adnym z samych strašnych momantaŭ u najnoŭšaj historyi».
«Pratestujučy suprać falsifikacyi vybaraŭ, na vulicy biełaruskaj stalicy vyjšli bolš jak 50 tysiač čałaviek, ale ŭłady pajšli na biesprecedentnyja pa žorstkaści represii, sprabujučy ŭtrymać uładu luboj canoj. Na praciahu adnoj nočy, jakaja paśledavała za dniom vybaraŭ, byli źbityja i aryštavanyja bolš za tysiaču čałaviek. Siońnia hetyja ludzi znachodziacca ŭ biełaruskich turmach. U turmie KDB siońnia ŭtrymlivajucca 23 čałavieki, 5 ź jakich — kandydaty ŭ prezidenty na minułych vybarach, 3 — žurnalisty, astatnija — kiraŭniki štaboŭ i davieranyja asoby kandydataŭ. Ich abvinavačvajuć u arhanizacyi i ŭdziele ŭ masavych biesparadkach, kryminalny artykuł za jakija praduhledžvaje da 15 hadoŭ turmy. Siońnia hetyja ludzi stali załožnikami ŭłady, jak i astatnija 9,5 młn. biełarusaŭ, što žyvuć u krainie. Siońnia Biełaruś ahornuta ciemraj. Praciahvajucca aryšty aktyvistaŭ, pahromy redakcyj niezaležnych sajtaŭ i haziet, vobyski na kvaterach. Ułady šantažyrujuć palitźniavolenych ich maleńkimi dziećmi, jakija zastalisia na voli», — zaznačajecca ŭ zvarocie.
Jaho aŭtary prosiać Papu svajoj malitvaj padtrymać biełarusaŭ, jakija znachodziacca za kratami, i vykarystać svoj aŭtarytet dla vyzvaleńnia nievinavatych z turmaŭ.
Volha Bandarenka — žonka davieranaj asoby kandydata ŭ prezidenty Andreja Sańnikava Dźmitryja Bandarenki — paviedamiła, što
napiaredadni była zroblena biespaśpiachovaja sproba sustrecca z apostalskim nuncyjem u Biełarusi arcybiskupam Marcinam Vidavičam,
kab pieradać zvarot Bieniedyktu XVI. Žonka palityka maje namier znoŭ pasprabavać pieradać hety list.
U intervju BiełaPAN pieršy sakratar apostalskaj nuncyjatury ŭ Biełarusi Kryśpin Vitold Dubiel patłumačyŭ, što dla sustrečy z arcybiskupam Marcinam Vidavičam
nieabchodna źjavicca ŭ nuncyjaturu i napisać zajavu z prośbaj ab pryjomie.
