Livijskija hramadzianie, jakija vučacca ŭ Biełarusi, z tryvohaj sočać za padziejami na radzimie. Jakoj budzie kraina, kali jany tudy viernucca, i ci viernucca ŭvohule — nieviadoma.
U Biełarusi pracujuć ci vučacca niekalki socień hramadzianaŭ Livii. U pryvatnaści, jany atrymlivajuć adukacyju ŭ šerahu staličnych VNU — Biełdziaržuniviersitecie, Biełaruskaj akademii fizkultury i sportu, Biełaruskim dziaržaŭnym miedyčnym univiersitecie, Biełaruskaj vajennaj akademii dy inšych.
Asablivy akcent zrobleny na Biełaruski dziaržaŭny ŭniviersitet infarmatyki i radyjoelektroniki. Havoryć načalnik upraŭleńnia mižnarodnych suviaziaŭ univiersitetu Hanna Citovič: «Budziem tak havaryć: ź Livii ŭ nas navučajucca dziesiatki, pieradusim heta aśpiranty. Jany ŭ pieravažnaj bolšaści ŭ nas usie nie junyja, vučylisia raniej, u tym liku ŭ Savieckim Sajuzie. U paźniejšyja časy chtości atrymlivaŭ adukacyju va Ukrainie, u Rasiei. Praktyčna ŭsie rasiejskamoŭnyja ŭ tym abjomie, jaki patrabujecca. Asnoŭnaja śpiecyjalizacyja — radyjotechnika, telekamunikacyi. Toje, čaho ŭ ich na radzimie brakuje».
Jak paznačana na sajcie BDUIR, pieršym dypłamavanym śpiecyjalistam vysokaha ŭzroŭniu ŭ VNU staŭ Muamar Kadafi. Letaś jon atrymaŭ dypłom hanarovaha doktara za «značny ŭniosak» u raźvićcio adukacyi i navuki, a taksama za ŭmacavańnie supracoŭnictva pamiž VNU Biełarusi i Livii.
Pośpiechi jahonych suajčyńnikaŭ bolš ścipłyja. Treci hod navučajecca ŭ adnym ź mienskich VNU livijec Chamid. Vyvučaje ekanomiku, niadrenna zasvoiŭ rasiejskuju movu, maryć zaniać hodnaje miesca na radzimie — śpiecyjalisty takoha profilu tam zapatrabavanyja. Ale doma ŭ Trypali zastalisia baćki, małodšy brat i dźvie siastry, tamu havaryć u adkrytuju ŭsio, što dumaje, nie advažvajecca. Kaža, što ruka Kadafi i jahonaha atačeńnia nastolki mahutnaja, što moža dastać luboha. Pilna sočyć za padziejami ŭ Livii, i, kab nie svajaki, tolki i zastałosia b, što čakać finału. «Zasłužanaha» — jak niedvuchsensoŭna ŭdakładniaje sam Chamid: «Dla kiraŭnictva krainy, viadoma, situacyja była nadzvyčaj spryjalnaja.
Z roznych bakoŭ hrošy ŭ kišeniu kapali, jany mahli sabie dazvolić usio što zaŭhodna. A nas trymali za niavolnikaŭ — maŭlaŭ, kruciciesia jak chočacie.Voś jakoje žyćcio ŭ nas nasamreč. Zrešty, heta ahulnaja tendencyja dla ŭsich, dzie panujuć takija režymy. A
nadzvyčaj žorstkija pavodziny ŭ hetaj situacyi — tolki ad złości, ad biaśsilla.Bolš za 40 hadoŭ ludzi maŭčali, tryvali, i raptam pračnulisia. Kamu takoje spadabajecca? Tamu situacyja zastajecca niezrazumiełaj i vielmi składanaj. Ale prosta nie treba davodzić ludziej da takoha stanu».
Naładžany ekspart adukacyi ŭ Liviju i pa śpiecyfičnych kirunkach. Minsk i Trypali majuć stasunki ŭ vajennaj halinie, što padčas apošniaha vizitu Kadafi asabliva padkreślivaŭ Alaksandar Łukašenka. Praŭda, u śviecie Arabskaja Džamachiryja maje sumnieŭnuju reputacyju «čornaj dzirki», kudy traplaje zbroja z usiaho śvietu i potym bieskantrolna razychodzicca nie tolki pa afrykanskim kantyniencie.
Livijskaje pradstaŭnictva — adno z samych šmatlikich u Vajennaj akademii Biełarusi, dzie taksama atrymlivajuć adpaviednyja viedy kursanty ź Vieniesueły, Vjetnamu, Kitaju, inšych stratehičnych sajuźnikaŭ Biełarusi.
Apošnim časam Biełaruś sprabuje «pryščapić» Livii i cikavaść da sportu. Spartoŭcy hetaj krainy nia majuć asablivych pośpiechaŭ na mižnarodnaj arenie, tamu Ministerstva sportu i turyzmu ŭźniało pytańnie ab pradstaŭleńni afrykanskim atletam spartovych bazaŭ dla sumiesnych trenirovak, a taksama prapanavała skarystać pasłuhi biełaruskich śpiecyjalistaŭ u jakaści trenieraŭ nacyjanalnych kamandaŭ na kantraktnaj asnovie. Ciapier, praŭda, Livii nie da sportu.
