Čatyry pasiedžańni spatrebilisia sudździ Partyzanskaha rajonnaha suda Miensku Natalli Pykinaj, kab pryhavaryć 20-hadovaha aktyvista Ruchu «Za Svabodu» Mikitu Lichavida da troch z pałovaj hadoŭ pazbaŭleńnia voli ŭ kałonii strohaha režymu.Viečaram 29 sakavika jana abviaściła prysud.
Prakuror Anton Zaharoŭski prasiŭ bolš — čatyry hady. Jon nastojvaŭ na ciažkim charaktary pravaparušeńnia i abapiraŭsia ŭ asnoŭnym na pakazańni troch dziasiatkaŭ śpiecnazaŭcaŭ, jakich pryznali paciarpiełymi ad dziejańniaŭ «biasčynstvujuščaj tałpy».
Praces pačaŭsia 22 sakavika. Jon adrazu pryciahnuŭ da siabie uvahu — abvinavačańnie zajaviła adrazu 29 paciarpiełych — usie jak adzin śpiecnazaŭcy, bajcy minskaha PMSP. I choć advakatcy Lichavida Darji Lipkinaj udałosia dakazać, što tolki nievialikaja častka ź ich moža nasamreč padćvierdzić svaje traŭmy dakumientalna, śpiecnazaŭcy praciahvali spraŭna raskazvać, jak ich bili demanstranty na płoščy Niezaležnaści ŭ viečar vybaraŭ.
Paciarpiełych było tak šmat, što tolki ich apytańnie zaniało dva dni pracesu. Advakat Lipkina pieršapačatkova prydzirliva raspytvała kožnaha bajca PMSP ab usich padrabiaznaściach pakazańniaŭ, dadzienych imi śledstvu, ale kali praz takuju ruplivaść atrymała adrazu niekalki papiaredžańniaŭ ad sudździ, to była vymušanaja zadavolicca mienšaj kolkaściu pytańniaŭ.
Adnak i ich chapała — śpiecnazaŭcy błytalisia ŭ pakazańniach, a śviedka — Alaksandr Bahdanaŭ — navat publična ŭ zali suda pryznaŭ, što składaŭ pratakoł zatrymańnia Mikity Lichavida nie zatrymlivajučy jaho.
Usio heta nie dapamahło. Niekalkich imhnieńniaŭ videazapisu, padčas jakich bačna, što Mikita nanosić udary ŭ draŭlanyja ščyty za raźbitymi voknami Doma ŭrada, było dastatkova, kab asudzić jaho na niemaleńki termin. Stanoŭčyja charaktarystyki piaci śviedkaŭ, siarod jakich byŭ i Alaksandr Milinkievič, nie byli ŭziatyja pad uvahu.
U zaklučnaj pramovie advakatka D.Lipkina sprabavała źviaruć uvahu sudździ, što fakt masavych biesparadkaŭ u Minsku viečaram 19 śniežnia nie dakazany, jak i fakt źniščeńnia jaje padabaronnym dziaržaŭnaj majomaści. Zaviaršeńnie pramovy navat było sustretaje apładysmientami parvaabaroncaŭ i rodnych Lichavida.
Adnak prysud byŭ žorstki.
«NN» viałaanłajn-repartaž z zały suda.
18.00
Sudździa Partyzanskaha suda stalicy Natalla Pykina pryznała Mikitu Lichavida vinavatym va ŭdziele ŭ masavych biesparadkach 19 śniežnia i pakarała jaho 3,5 hadami źniavoleńnia ŭ kałonii strohaha režymu.
16:05
Darja Lipkina skazała, što sprava vielmi składanaja i zaklikała sudździu apraŭdać Mikitu Lichavida. Jejnaja pramova była sustreta apładysmientami załaj (nie plaskali ŭ dałoni tolki śpiecnazaŭcy).
Mikita Lichavid u svajoj pramovie całkam padtrymaŭ usie tezy, vykazanyja advakatam.
Prysud budzie abvieščany nie raniej za 18:00. Pravaabaroncy nastrojenyja piesimistyčna, jany miarkujuć, što Mikita budzie pakarany tryma hadami źniavoleńnia.
15:50
Advakatka nahadała sudu, što ŭsie apytanyja paciarpiełyja śpiecnazaŭcy zajavili, što Lichavida na Płoščy nie bačyli i nie źjaŭlajucca śviedkami parušeńniaŭ, ździejśnienych im.
Advakatka zaznačyła, što ab asobie Lichavida moža śviedčyć navat koła śviedkaŭ, jakija siońnia vystupili ŭ jaho abaronu. Abaronca taksama havoryć, što ŭdziejańnie natoŭpu mahło vymusić Mikitu Lichavida ździejśnić učynki, jamu nieŭłaścivyja.
15:03
Pačynaje pramovu advakat Lichavida Darja Lipkina. Jana adrazu ŭkazała na šerah pamyłak, jakija, na jaje dumku, dapuściŭ prakuror u svajoj pramovie. Lipkina nie pahadžajecca z tym, što dakazany fakt naniasieńnia paškodžańniaŭ Domu ŭrada, a taksama ŭzbrojeny supraciŭ milicyi.
Jana taksama zaznačyła, što sprava ab masavych biesparadkach źjaŭlajecca ŭnikalnaj dla najnoŭšaj historyi. Jana nastojvaje na tym, što sam fakt masavych biesparadkaŭ 19 śniežnia nie ŭstanoŭleny, ale jak masavyja biesparadki zhodna z Kryminalnym kodeksam — heta sukupnaść pahromaŭ, pažaraŭ, uzbrojeny supraciŭ milicyi, hvałt nad asobaj i źniščeńnie majomaści. Na dumku advakata, heta sukupnaść nie mieła miesca na płoščy Niezaležnaści.
D. Lipkina taksama ličyć, što abvinavačańniu nie ŭdałosia dakazać fakt źniščeńnia Lichavidam majomaści Doma ŭrada. Byŭ tolki zafiksavany momant, kali Mikita Lichavid nanosiŭ udary pa draŭlanych ščytach, jakija pierakryvali akonnyja prajomy.
Traŭmy 22 z 29 śpiecnazaŭcaŭ nie majuć paćviardžeńnia sudmiedekśpiertyzy.
Advakat nahadała sudździ, što paškodžańni, atrymanyja śpiecnazaŭcami na Płoščy, u bolšaści vypadkaŭ nie paćviardžajucca dadzienymi miedekśpiertyzy. Heta dazvalaje sumniavacca ŭ praŭdzivaści ich pakazańniaŭ.
Jana pryviała taksama prykłady masavych biesparadkaŭ u Rasii, Małdovie i Armienii, jašče raz zaznačyŭšy, što fakt ździajśnieńnia 19 śniežnia ŭ Minsku masavych biesparadkaŭ nie dakazany.
14:59
Prakuror ličyć, što ahułam pakazańni paciarpiełych i samaho Lichavida dastatkovyja dla taho, kab pryznać abvinavačanaha vinavatym. Jon prosić uličyć palahčajučyja i abciažarvajučyja abstaviny i pakarać Lichavida 4 hadami kałonii strohaha režymu.
14:52
Pramaŭlaje prakuror Anton Zaharoŭski (jon vioŭ praces Vasila Parfiankova). Prakuror ličyć, što Lichavid braŭ udzieł u masavych biesparadkach, źjaŭlaŭsia ŭdzielnikam» biasčynstvujuščaha» natoŭpu. Śćviardžaje taksama, što Lichavid akazvaŭ supraciŭ supracoŭnikam milicyi i łamaŭ dźviery Doma ŭrada, biŭ vokny. U adnaho sa śpiecnazaŭcaŭ jon vyciahnuŭ ščyt.
Dziaržaŭny abvinavaŭca ličyć, što pakazańni ŭsich paciarpiełych śpiecnazaŭcaŭ možna zhrupavać — jany dakazvajuć toje, što demanstranty aktyŭna supraciŭlalisia śpiecnazu, sprabavali prarvać šerah milicyi.
14:40
Prysutnych na pracesie zapuścili ŭ zału. Praź niekatory čas pasiadžeńnie adnovicca. Jano pačniecca sa sprečak bakoŭ. Pravaabaroncy ličać mahčymaść stanoŭčaha dla Lichavida prysudu małavierahodnaj. Razam z tym jany ličać, što siońniašni vyrak budzie śviedčyć ab tym, jaki nakirunak abrali ŭłady dla dalejšych pracesaŭ.
13:45
Abvieščany pierapynak da 14:45. Paśla abiedu buduć vystupy prakurora, advakata, i, mahčyma, vyrak sudździ.
šmat ludziej, šmat moładzi: siabry Lichavida, jaho svajaki, zastaŭsia Milinkievič, jon zaraz staić pobač z maci Lichavida. Prysutničajuć žurnalisty dziaržaŭnych ŚMI, Biełsata.
13:42
Aleh Hułak źviartaje ŭvahu na niepaśladoŭnaść dziejańniaŭ śpiecsłužbaŭ. U pryvatnaści, jamu niezrazumieła, čamu śpiecnaz spačatku dziejničaŭ vielmi małymi siłami, jak byŭ pravakujučy natoŭp na aktyŭnyja dziejańni suprać jaho, a taksama čamu šerah śpiecnaza, jaki padyšoŭ da pabitych voknaŭ pieršym, tak chutka adyšoŭ nazad.
Hułak skančaje davać pakazańni, pytańni da jaho ŭźnikli tolki ŭ sudździ. Ni prakuror, ni paciarpiełyja da jaho pytańniaŭ nie mieli.
Advakat Lipkina iznoŭ źviartajecca da sudździ z chadajnictvam acanić toje, ci mieli miesca masavyja biesparadki i zaprasić dadatkovyja materyjały. Sudździa adchiliła chadajnictva, abviaściŭšy sudovaje śledstva zakrytym.
13:33
Hułak ličyć, što biaździejnaść milicyi, jakaja nie zaminała bićciu voknaŭ, mahła spravakavać inšych udzielnikaŭ akcyi na niezakonnyja dziejańni.
13:26
Hułak vykazaŭ mierkavańnie, što ludzi, jakija bili vokny, nie byli źviazanyja z ahulnaj masaj demanstrantaŭ. Na jaho dumku, jany navat fizična nie mahli čuć zaklikaŭ palitykaŭ, jakija pramaŭlali dla adzinaj masy.
13:09
Pravaabaronca taksama raskazaŭ, što paśla zaviaršeńnia akcyi bačyŭ, jak śpiecnazaŭcy haniali pa Płoščy ludziej, niekatorych źbivali.
Hułak raskazaŭ, jak jaho zatrymlivali ŭ rajonie płoščy Niezaležnaści, u pratakole paznačyli čas zatrymańnia 22:30, chacia nasamreč heta adbyłosia kala hadziny nočy. Na nastupny dzień u sudzie A. Hułak adpuścili, a spravu nakiravali na dapracoŭku.
13:06
Hułak raskazaŭ, što čuŭ zakliki padyści da Doma ŭrada, ale zaklikaŭ uvachodzić unutr nie było. Śćviardžaje, što kandydaty vystupali la pomnika Leninu, a ŭ toj čas pačulisia ŭdary pa škle.
Hułak raskazvaje, što kali pačali bić škło ŭ voknach, jon padychodziŭ da supracoŭnikaŭ milicyi, čamu jany nie pieradkadžajuć? Adkazu nie było. Ale Hułak taksama nastojvaje, što zaklikaŭ razyścisia la Doma ŭrada čuvać nie było.
Pravaabaronca raskazvaje, što jak tolki śpiecnaz źjaviŭsia la dźviarej Doma ŭrada, milicyjanty adrazu pačali ŭžyvać siłu — nanosili ŭdary demanstrantam dubinkami.
Hułak jašče raz zaznačyŭ, što nie čuŭ na Płoščy zaklikaŭ bić škło, byli tolki zakliki iści da pieramohi.
Hułak raspavioŭ sudździ, što bačyŭ, jak pry zatrymańni śpiecnazaŭcy valili ludziej na ziamlu i źbivali. Jon pry hetym zaŭvažaje, što nie bačyŭ, kab niechta z demanstrantaŭ aktyŭna sucpraciŭlaŭsia źbićciu.
12:54
Nastupny śviedka — Aleh Hułak, kiraŭnik Biełaruskaha Chielsinskaha kamiteta. Jon zajaviŭ, što nie znajomy ź Lichavidam. Advakat zadaje jamu pytańni ab padziejach na Płoščy.
Hułak kaža, što prysutničaŭ na ŭsich hałoŭnych padziejach 19 śniežnia. Tłumačyć svaju prysutnaść tym, što BCHK viadzie manitorynh parušeńniaŭ pravoŭ čałavieka, u tym liku i na masavych mierapryjemstvach.
Hułak raskazvaje, jak išoŭ z demanstrantami pa praśpiekcie. Kaža, što nie bačyŭ u rukach demanstrantaŭ nijakich padazronych pradmietaŭ, nie bačyŭ ahresiŭnych ludziej. Aleh Hułak taksama śćviardžaje, što supracoŭniki DAI pierakryli bakavyja ŭjezdy na praśpiekt, adnak mašyna chutkaj dapamohi mahła spakojna prajechać pa praśpiekcie — demanstranty jaje prapuścili.
Hułak kaža, što na Kastryčnickuju płošču pryjšoŭ u 19:30, pabačyŭ tam kala 5 tys čałaviek. Jaho taksama ździviła toje, što ahłušalna hučna hrała muzyka, a koŭzanka była niezvyčajna vialikaja.
12:45
Nastupnaja śviedka — byłaja nastaŭnica Lichavida Ludmiła Šlepierava. Pakazańni daje
Šlepierava kaža, što viedaje Lichavida z 1997 hoda, kaža, što Mikita nie mieŭ kanfliktaŭ z adnakłaśnikami, byŭ zaŭsiody aktyŭny ŭ škole, adstojvaŭ svaje pohlady.
Šepieleva taksama raskazvaje, što Mikita Lichavid dapamahaŭ žycharam Uručča adstajać svaje pravy, kali jany vystupili suprać niezakonnaj zabudovy.
Nastaŭnica taksama pazityŭna acharaktaryzavała siamju Lichavida, źviarnułasia da sudździ sa słovami: «Ja liču, što Mikitu niama ŭ čym abvinavačvać i jon pavinien apynucca siońnia doma».
12:36
Pačynajecca dopyt śviedki abarony Litvinava, heta siabra Lichavida. Vadzim Litvinaŭ taksama stanoŭča charaktaryzuje Lichavida, kaža, što viedaje Mikitu šeść hadoŭ.
12:25
Pačaŭsia dopyt śviedki abarony Ihara Dudarava — siabra siamji Lichavidaŭ.
Dudaraŭ kaža, što viedaje Lichavida ŭsio žyćcio. Charaktaryzuje jaho stanoŭča, kaža. što jaho syn — adnahodak Mikity, i jon časta bačyŭ syna razam ź Mikitam. Heta śviedku zadavalniała, bo jon daviaraje Lichavidu.
Dudaraŭ zajaviŭ sudździ, što Lichavid nie złodziej i nie hvałtaŭnik, a prava vykazvać svaje dumki, jość u kožnaha. Śviedka dadaje, što čas praviedzieny ŭ SIZA, dastatkovaje pakarańnie dla taho, kab praanalizavać svaje ŭčynki.
12:16
Nastupny śviedka abarony — Natalla Łyčkoŭskaja, jana siabroŭka siamji Lichavida, susiedka, viedaje Mikitu 20 hadoŭ. Charaktaryzuje jaho jak vielmi dobraha čałavieka, vysokamaralnaha. Śćviardžaje, što nie bačyła, što jon piŭ na zastollach navat piva.
Łyčkoŭskaja — adna z padpisantak kalektyŭnaj charaktarystyki na Lichavida. jakuju padpisali 39 žycharoŭ doma, dzie žyvie siamja
padazravanaha.
Łyčkoŭskaja prosić sudździu uličyć svaje pakazańni pry vyniasieńni prysudu. Nazyvaje Lichavida vysokamaralnym čałaviekam.
12:12
Advakat apytvaje Milinkieviča, jak daŭno jon viedaje Lichavida. Pakazańni Milinkieviča zacikavili śpiecnazaŭcaŭ, kali jon zaznačyŭ, što Biełarusi patrebna bolš takich ludziej, jak Lichavid — dyscyplinavanych i dobra vychavanych. Milinkieviča taksama zaznačyŭ, što Lichavidu nieŭłaścivyja ahresiŭnyja dziejańni, a emocyi časam ułaścivyja ŭsim.
Milinkieviča pra Lichavida: «Aktyŭny małady čałaviek, my vielmi radyja, što takija ludzi, jak jon, jość siarod nas».
Advakatka pry apytańni Milinkieviča zrabiła nacisk na toje, što Ruch za Svabodu aficyjna zarehistravany.
Dopyt Milinkieviča skončany, ni prakuror, ni sudździa, ni paciarpiełyja pytańniaŭ nie majuć.
12:10
U abaronu Lichavida śviedčyć Milinkievič.
12.05
Pačałosia apytańnie pieršaha śviedki abarony — Alaksandra Ciciankova. Jon kiruje adździełam łahistyki ŭ firmie, dzie niekali byŭ pracaŭładkavany Mikita Lichavid.
Alaksandr Ciciankoŭ raskazvaje ab padazravanym. Śćviardžaje, što za čas pracy na jaho pradpryjemstva (paŭtara hoda), Lichavid zarekamiendavaŭ siabie dobra i jak supracoŭnik, i jak čałaviek. «Jon narmalny chłopiec», — takimi słovami skončyŭ svoj vystup Ciciankoŭ.
12.00
Advakat Lipkina prosić sudździu pravieści apytańnie śviedkaŭ abarony. Papiaredniaje chadajnictva ab dałučeńni da materyjałaŭ spravy dadatkovaha videazapisa było adchilenaje.
11.55
Advakatka Lipkina źviarnuła ŭvahu sudździ na toje, što na praciahu ŭsiaho času bićcia škła hetamu nie pieraškadžali supracoŭniki pravaachoŭnych orhanaŭ — jany źjavilisia na miescy tolki tady, kali ŭžo ŭsio było skončana.
Darja Lipkina taksama vykazała svoj pohlad na źjaŭleńnie ŭ kadry Mikity Lichavida. Na jaje dumku, padabaronny Lichavid na videa vyhladaje vielmi razhublenym i nie pradprymaje aktyŭnych dziejańniaŭ.
Advakatka, u svaju čarhu, źviarnuła ŭvahu sudździ, što na praciahu ŭsich 33 chvilinaŭ videazapisu na im nie adlustravany ni adzin fakt prymianieńnia siły ŭ dačynieńni da śpiecnazaŭcaŭ. U suviazi z hetym, Lipkina padała chadajnictva ab zapycie dadatkovaha videazapisu, zroblenaha paciarpiełym Sarokam.
11.50
Skončyŭsia prahlad videazapisu. Paśla jaho advakatka Darja Lipkina vystupiła z zajavaj, u jakoj zaznačyła, što za 33 chviliny videa na im nie było zafiksavana fakta masavych biesparadkaŭ. Adkavatka śćviardžaje, što videa pazbaŭlena bujnych płanaŭ i navat praz heta nie moža śviedčyć ab tym, što na płoščy Niezaležnaści mieli miesca masavyja biesparadki.
Advakat Lipkina taksama ličyć, što ź videa vynikajuć dokazy tolki administratyŭnych pravaparušeńniaŭ. Ukazvaje taksama, što videa nie padćviardžaje zaklikaŭ razychodzicca. Na videa vyrazna zafiksavanyja pahrozy ŭžyć fizičnuju siłu da demanstrantaŭ, jakija ahučvalisia praź miehafon pradstaŭnikami pravaachoŭnych orhanaŭ. Hety fakt taksama vyklikaŭ pytańni ŭ advakatki — jana ličyć heta nieabhruntavanym.
11.45
Na videa narešcie skončyli bić škło ŭ voknach Domu urada. Zaraz demanstrujucca kadry apošnich chvilin demanstracyi. Čuvać hałasy Natalli Kalady i Anatola Labiedźki.
11.35
Zapis bićcia voknaŭ praciahvajecca ŭžo bolš dziesiaci chvilin. Mahčyma, jon składzieny z zapisaŭ adrazu niekalkich kamier. Inačaj patłumačyć takuju praciahłaść niemahčyma.
11.25
Paśla pramovaŭ Sańnikava videazapis pieraklučyŭsia na bićcio škła ŭ voknach Doma ŭrada. Zdymki nieprafiesijnyja — jakaść karcinki drennaja i jana ŭvieś čas skača ŭ baki. Chutčej za ŭsio, što heta materyjały apieratyŭnych zdymkaŭ, što na płoščy Niezaležnaści pravodzili supracoŭniki pravaachoŭnych orhanaŭ u cyvilnym. Adzin ź ich prachodzić pa spravie Lichavida paciarpiełym. Jon nazyvaŭ padobnuju dziejnaść «fiksacyjaj».
11.21
Na videazapisie, jaki demanstrujecca zaraz u sudzie, šmat pramovaŭ Andreja Sańnikava. Inšyja kandydaty čamuści amal nie fihurujuć. Apieratar vybraŭ momanty, padčas jakich
11.20
Siońnia na pracesie ŭzmocnienaja achova — na kožnym šerahu pa śpiecnazaŭcu, jakija sočać za prysutnymi. Siarod śpiecnazaŭcaŭ jość i adna žančyna.
11.12
Čytańnie materyjałaŭ spravy skončanaje. Zaraz pačniecca prahlad videazapisu. Sudździa Natalla Pykina vyrašyła zrabić heta z dapamohaj nievialikaha noŭtbuka, a nie televizara — u vyniku prysutnym u zale zusim ničoha nie vidać. Videa hladziać z hukam, adnak jon vielmi cichi — razabrać niešta z zały nadzvyčaj składana. Čuvać tolki łozunhi «Žyvie Biełaruś», hołas Sańnikava i Statkieviča.
11.00
Prakuror praciahvaje čytać materyjały spravy. Bolšaja častka z ahučanaha — apisańnie traŭm paciarpiełych śpiecnazaŭcaŭ.
10.45
Advakatka źviarnuła ŭvahu sudździ Natalli Pykinaj na čarhovaje niesupadzieńnie. Sprava ŭ tym, što Mikitu Lichavida, akramia inšaha, abvinavačvajuć taksama i ŭ paškodžańniach, naniesienych Domu ŭrada — u tym liku paškodžańniach dyvanovych darožak, što nibyta byli sapsavanyja demanstrantami. Adnak u materyjałach spravy, jakija praciahvaje začytvać prakuror, niama ni słova ab hetym.
10.25
Advakat Darja Lipkina paviedamiła sudździ, što rodnyja Mikity Lichavida hatovyja kampiensavać usiu škodu, naniesienuju ich synam. Maci Mikity, Alena Lichavid, źviarnułasia z prośbaj rastłumačyć miechanizm kampiensacyi, kali sud paličyć heta mahčymym.
Zaraz prakuror začytvaje charaktarystyki na abvinavačanaha. Pavodle ich Mikita charaktaryzujecca stanoŭča, adznačajecca, što jon ź niapoŭnaj siamji, žyvie razam z maci i babulaj.
Charaktarystyku ad Ruchu «Za Svabodu» dla Mikity Lichavida napisaŭ Alaksandr Milinkievič.
10.23
Sa słovaŭ prakurora, da spravy Lichavida było taksama dałučana kalektyŭnaje chadajnictva PBNF ab źmianieńni miery strymańnia.
10.10
Ahučvajucca materyjały spravy, dzie pieraličanyja paškodžańni paciarpiełych śpiecnazaŭcaŭ. adnak pravaabaroncy zaznačajuć, što ŭ materyjałach spravy amal całkam adsutničajuć vyniki sudmiedekśpiertyz — paciarpiełyja śpiecnazaŭcy paprostu admovilisia ich prachodzić. U vyniku abvinavačańnie hruntujecca na zapisach špitala MUS.
10.00
Praces adnaviŭsia. Zaraz prakuror praciahvaje čytać materyjały spravy — padčas minułaha pasiedžańnia sudździa spyniła jaho praz toje, što byŭ pieravyšany limit času, na praciahu jakoha moža praciahvacca pasiedžańnie — 8 hadzinaŭ.
9.55
Pravaabaroncy schilajucca da dumki, što siońniašni dzień stanie apošnim u pracesie. Zastałosia zasłuchać tolki dvuch śviedkaŭ z boku abarony — palityka Jurasia Hubareviča i pravaabaroncu Aleha Hułaka i prahladzieć videazapis z Płoščy.
Mahčyma, što prysud budzie vyniesieny ŭžo paśla abiedu.
9.50
U zalu zapuścili paciarpiełych śpiecnazaŭcaŭ, rodnych Mikity Lichavida, žurnalistaŭ, pravaabaroncaŭ. Pamiaškańnie zapoŭnienaje całkam.
Babula abvinavačanaha pryniesła z saboj nievialikuju ikonku. Achova heta zaŭvažyła i nastojliva paprasiła schavać jaje. «Heta nie carkva», — skazaŭ milicyjant.
20-hadovaha junaka vinavaciać va ŭdziele ŭ masavych biesparadkach, naniasieńni škody budynku Doma ŭrada, a taksama ŭzbrojenym supracivie supracoŭnikam milicyi.
Praces pačaŭsia 22 sakavika, adnak u pieršy dzień sud zmoh vysłuchać pakazańni tolki dziesiaci z 29 paciarpiełych na Płoščy śpiecnazaŭcaŭ. Druhi dzień razhladu spravy vyniku taksama nie prynios — advakatka vyjaviła surjoznyja supiarečnaści ŭ pakazańniach adzinaha śviedki i ŭ vyniku sudździa pieraniesła razhlad spravy na treci dzień — 24 sakavika. Adnak praz chvarobu dzicia advakatki D.Lipkinaj pasiedžańnie pieranieśli na 29 sakavika.
Nahadajem, što aktyvist Ruchu «Za svabodu» Mikita Lichavid byŭ zatrymany 19 śniežnia na płoščy Niezaležnaści i asudžany na 15 sutak aryštu ŭ Žodzinskim SIZA. Adnak 23 studzienia pastanova ab aryšcie była admieniena, i Mikita byŭ pieraviedzieny ŭ status abvinavačanaha pa spravie ab masavych biesparadkach. Z Žodzina jaho pieraviali ŭ minskuju «Vaładarku».
Spravu Mikity Lichavida razhladajuć u sudzie Partyzanskaha rajona Minska. Sudździa — Natalla Pykina, advakat — Darja Lipkina.
Abvinavačvanymi pa spravie ab masavych biesparadkach źjaŭlajucca 42 čałavieki. Siamiora ź ich užo asudžany: za ŭdzieł u masavych biesparadkach Vasil Parfiankoŭ pryhavorany da čatyroch hadoŭ pazbaŭleńnia voli ŭ kałonii strohaha režymu; Alaksandr Atroščankaŭ — da čatyroch hadoŭ u kałonii ŭzmocnienaha režymu; Dźmitryj Novik i Alaksandr Małčanaŭ — da troch z pałovaj i troch hadoŭ u kałonii ŭzmocnienaha režymu adpaviedna; hramadzianie RF Arciom Breus i Ivan Haponaŭ — da štrafu ŭ 300 bazavych vieličyniaŭ (10,5 młn. rubloŭ) kožny; Dźmitryj Miadźviedź — da troch hadoŭ abmiežavańnia voli biez nakiravańnia ŭ papraŭčuju ŭstanovu
