Siarhiej Papkoŭ staŭ novym hiendyrektaram «Biełtelekama»

Novym hienieralnym dyrektaram RUP «Biełtelekam» pryznačany Siarhiej Papkoŭ, jaki raniej zajmaŭ pasadu dyrektara filijała «Biełtelekama» «Minskaja haradskaja telefonnaja sietka».

Novaha kiraŭnika 5 krasavika pradstaviŭ ministr suviazi i infarmatyzacyi Mikałaj Pancialej, paviedamili BiełaPAN u «Biełtelekamie».

Kanstancin Cikar, jaki ŭznačalvaŭ kampaniju na praciahu apošnich piaci hadoŭ (z 30 studzienia 2006 hoda), zaviaršyŭ pracu na pasadzie kiraŭnika pradpryjemstva pavodle zhody bakoŭ.

Za piać hadoŭ nacyjanalny apieratar elektrasuviazi «Biełtelekam» inviestavaŭ prykładna 2,5 trłn. rubloŭ u budaŭnictva vałakonna-aptyčnych linij suviazi, madernizacyju miascovaj telefonnaj sietki, mižnarodnych stancyj, tranzitnych vuzłoŭ, sietki pieradačy danych i inšaha abstalavańnia.

Kampanii ŭdałosia davieści ŭdzielnuju vahu dachodaŭ ad pasłuh pieradačy danych z 5,3% u 2006 hodzie da 21,6% u 2010 hodzie pry 9-pracentnym źnižeńni dachodaŭ ad tradycyjnych hałasavych pasłuh, charakternym dla rynku ŭ cełym.

Pavodle vynikaŭ 2010 hoda ŭ kampanii było 750 tysiač abanientaŭ šyrokapałosnaha dostupu ŭ internet byfly (rost na 350 tysiač u 2010 hodzie). Na asnovie isnaj sietkavaj infrastruktury «Biełtelekam» paśpiachova startavaŭ ź pieršym ličbavym interaktyŭnym telebačańniem ZALA i z 2008 hoda padklučyŭ 220 tysiač abanientaŭ (rost na 160 tysiač u 2010 hodzie) pa ŭsioj krainie.

***

Siarhiej Papkoŭ naradziŭsia 10 kastryčnika 1957 hoda. U 1983 hodzie skončyŭ Minski radyjotechničny instytut, u 1999 hodzie — Akademiju kiravańnia pry prezidencie Biełarusi. Prafiesijny rost pačaŭ u 1983 hodzie na pasadzie staršaha inžyniera, načalnika stancyjnaha ŭčastka Zavodskaha liniejna-stancyjnaha cecha Minskaj haradskoj telefonnaj sietki (MHTS). U roznyja hady zajmaŭ pasady namieśnika načalnika Frunzienskaha ŁSC MHTS, namieśnika načalnika sietki MHTS, hałoŭnaha inžyniera MHTS, z 26 žniŭnia 2008 hoda — dyrektar filijała «Minskaja haradskaja telefonnaja sietka» RUP «Biełtelekam».

«Biełtelekam» byŭ stvorany 3 lipienia 1995 hoda. Źjaŭlajecca pieršasnym internet-pravajdaram u Biełarusi, ažyćciaŭlaje pieradaču danych pa kamutavanaj sietcy ahulnaha karystańnia, zabiaśpiečvaje dostup da mižnarodnych i biełaruskich resursaŭ internetu, daje ŭ karystańnie mižnarodnyja ličbavyja patoki i kanały praktyčnaj luboj jomistaści, zabiaśpiečvaje roŭnyja ŭmovy pracy apierataraŭ mabilnaj suviazi Biełarusi šlacham padklučeńnia ich da mižnarodnaj stancyi, daje mižharodni i mižnarodny roŭminh. Alaksiej Areška, BiełaPAN.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH