Najbolš — uładzie, kab adciahnuć ludziej ad valutnaha kryzisu.
Nabiehi biełarusaŭ na kramy, jakija praciahvajucca ŭžo tydzień, vyhladajuć idealna zrežysiravanaj akcyjaj. Pastavić usiu krainu ŭ čarhu nie tak i prosta, jak vyhladaje na pieršy pohlad. Dla hetaha treba albo čyjeści biazhłuzdyja dziejańni (jak u situacyi z valutaj i Nacbankam), albo čyjaści tvorčaja zadumka. Ale čyja? Chto najbolš udała skarystajecca situacyjaj z cukrovaj panikaj?
1. Ułada
Nasielnictva, jakoje jašče tydzień tamu stajała ŭ ahulnaj čarzie pad dźviaryma abmieńnikaŭ, jašče nie nahadvała azłoblenuju krytyčnuju masu, ale psavała karcinku bieskłapotnaj Biełarusi. Ciapier ad tych, chto paluje na valutu, adździalilisia ludzi, što šturmujuć kramy i hipiermarkiety ŭ pošukach cukru dy aleju.
Što abmiarkoŭvajecca ŭ hramadstvie? Užo nie devalvacyja i navat nie adsutnaść dalaraŭ. Novaje pytańnie tydnia — dzie znajści cukar? Pryčym niavažna, ci patrebny nasamreč ludziam toj cukar.
Varta nahadać, što panika nie abrynułasia adrazu na ŭsiu krainu. Dajšoŭšy da Minska ŭ kancy hetaha tydnia, «cukrovaja panika» spačatku prabiehłasia pa rehijonach. Jašče ŭ apošnich dniach sakavika «tryvožnyja» sihnały prychodzili z Hrodzienščyny. Pradavački ŭ kramach pierakazvali pakupnikam pačutyja niedzie apieratyŭnyja dadzienyja: zaŭtra cukar budzie kaštavać 7 tysiač. Zrešty, jak i krupy. Hrodziency źmiatali ŭsio z pryłaŭkaŭ, pakul stalica i uschod krainy navat nie zdahadvalisia pra «miarkujemaje» padaražańnie.
U siaredzinie tydnia čutki pieraciakli na Brestčynu, a ciapier dasiahnuli i Minščyny. Kali b u kramy łamanułasia ŭsia kraina, efiekt byŭ by bolš niepradkazalnym. A tak — nibyta zhodna z zaćvierdžanym hrafikam.
2. Biełaruskija vytvorcy
Kiraŭnik «Biełdziaržcharčprama» Ivan Dančanka zajaŭlaje, što na składach lažyć jašče 165 tysiač ton cukru. Jamu varta dać viery. Heta ŭ čas kryzisa čynoŭniki nazyvali takija ličby z naściarohaj, kab nie vyklikać hnieŭ Łukašenki ci Sidorskaha. Ciapier zapasy cukru nazyvajucca ledź nie z honaram — pahladzicie, jak my zahadzia pakłapacilisia!
165 tysiač niepradadzienych ton u situacyi, kali nasielnictva štohod skuplaje kala 200 tysiač ton, heta rezierv, jaki dazvolić zakłaści lubyja pryłaŭki. Pryčym panika ŭ Zachodniaj Biełarusi ŭžo zhasaje. Siemji zakupilisia pa 10–20 kiłahramaŭ cukru i krupaŭ, unieśli svoj uniosak u razhruzku składaŭ. Maŭr zrabiŭ svaju spravu sa ščyrym pierakańniem, što heta jon padmanuŭ cukrovyja zavody i dziaržavu ŭ cełym.
3. Kramy i handlovyja sietki
Apošnija tydni nasielnictva pasprabavała vytrymać paŭzu — usie najaŭnyja biełaruskija rubli byli pa mahčymaści pieraviedzienyja ŭ valutu i załatyja źlitki. Pradaŭcy ŭ kramach nie chavali — tavaraabarot rezka źmienšyŭsia.
Zatoje ciapier prablema vyrašana, i ź jakim impetam! Zrazumieła, što nie abyšłosia i biez zališniaha starańnia na miescach. Naprykład, ad paniadziełka zakryvajecca drobnaaptovaja siekcyja adnaho z najbujniejšych dyskaŭnteraŭ «Jeŭraopt». Tłumačeńnie prostaje — ź jaho vynieśli ŭsio. I kali ŭ dačynieńni da impartnych tavaraŭ heta zrazumieła, to navošta skuplać pradukty, zroblenyja ŭ Biełarusi?
