Na scenie Nacyjanalnaha akademičnaha teatra imia Ja.Kupały ŭpieršyniu pastaŭlena trahiedyja "Makbiet" Uiljama Šekśpira. Jak paviedamili karespandentu BIEŁTA u teatry, premjera hetaha śpiektakla adbudziecca 16 i 17 śniežnia.
Heta adzin z samych zahadkavych i mistyčnych tvoraŭ vialikaha anhlijskaha dramaturha, i ź im źviazana mnostva lehiend i prykmiet. Naprykład, kažuć, što nielha ŭhołas vymaŭlać nazvu pjesy, pakolki heta moža prynieści niaščaście, tamu jaje časta nazyvajuć prosta "Šatłandskaj pjesaj". "Makbiet" taksama - adna ź niamnohich šekśpiraŭskich pjes, razam z "Hamletam" i "Ryčardam III", hieroi jakich sutykajucca ź nieziamnym śvietam.
Pastanoŭka "Makbieta" ŭ Kupałaŭskim teatry abiacaje vyhadna vyłučacca aryhinalnym sceničnym i płastyčnym vyrašeńniem. Akramia taho, pavodle viersii režysiora-pastanoŭščyka Alhirdasa Łatenasa, linija pjesy zrušvajecca ŭ bok łedzi Makbiet. Jana taja hierainia, vakoł jakoj raźvivajecca ŭsio dziejańnie, što adbyvajecca na scenie. Viedźmy ž uvasablajucca ŭ dumki łedzi Makbiet. U postmadernisckaj stylistycy na scenie stvarajucca asablivyja ŭmovy isnavańnia hierojaŭ, jakija raskryvajuć ich unutrany śviet. Asnoŭnaj ruchajučaj siłaj zastajecca kachańnie pamiž Makbietam i łedzi Makbiet, jakoje padšturchoŭvaje ich da zabojstva, a paśla ŭsich pierypietyj spustašajecca, tym samym śćviardžajučy niesumiaščalnaść dabra i zła.
Tekst pjesy i kolkaść dziejučych asob skaročana, kab akcentavać uvahu na hałoŭnych hierojach i zrabić śpiektakl bolš dynamičnym. Zaviaršajecca ž jon i zusim niečakana. Aryhinał nie adchilajecca, ale siužetnaja linija prałamlajecca praz pryzmu bačańnia režysiora.
Hałoŭnyja roli vykonvajuć Aleh Harbuz i Śviatłana Zielankoŭskaja. U śpiektakli zaniaty narodny artyst Biełarusi Mikałaj Kiryčenka, zasłužanyja artysty Respubliki Biełaruś Viktar Manajeŭ i Siarhiej Kraŭčanka, artysty Andrej Kavalčuk, Ihar Dzianisaŭ, Viačasłaŭ Paŭluć, Siarhiej Čub, Pavieł Jaskievič, Alaksandr Paŭłaŭ i inšyja.
Jarkaje vidovišča stvaraje na scenie cełaja pastanovačnaja hrupa ź Litvy - viadomy ŭ Jeŭropie režysior Alhirdas Łatenas, papularnyja litoŭskija mastak-scenohraf Hintaras Makarevičus i mastak pa kaściumach Sandra Straŭkajte, a taksama viadomy litoŭski kampazitar Faŭstas Łatenas. Režysior pa płastycy - Pavieł Adamčykaŭ.
