Syn Kadafi zahinuŭ, sam Muamar vyžyŭ pad udaram NATO 37

U subotu ŭviečary samaloty mižnarodnaj kaalicyi nanieśli ŭdar pa adnym z pałacaŭ u kvartale-rezidencyi Muamara Kadafi, jaki nazyvajecca Bab-al-Azizija.

Pradstaŭnik Kadafi pa suviaziach z presaj Musa Ibrahim abvieściŭ, što ŭ vyniku avijaŭdaru zahinuli małodšy syn Kadafi Saif al-Arab i troje ŭnukaŭ Kadafi. Pa słovach Ibrahima, «lidar [Muamar] sa svajoj žonkaj znachodzilisia ŭ budynku ź siabrami i rodnymi, lidar znachodzicca ŭ dobrym zdaroŭi, jon nie paciarpieŭ. Heta była pramaja sproba zabić lidara našaj krainy».

Jak śćviardžajuć kadafisty, abjektam nalotu staŭ pałac, u jakim žyŭ Saif al-Arab Kadafi.

Livijskija ŭłady dastavili da jaho zamiežnych žurnalistaŭ. Jany paviedamlajuć, što budynak mocna razburany. U jaho trapiła prynamsi try rakiety.

NATO paćvierdziła fakt naniasieńnia avijaŭdaru pa abjekcie ŭ Trypali ŭ subotu ŭviečary, ale śćviardžaje, što ŭdar byŭ skiravany na źniščeńnie kamandna-kantrolnaj infrastruktury sił Kadafi.

Saif al-Arab byŭ małodšym z synoŭ Kadafi. Jon pryciahvaŭ da siabie mienš uvahi, čym jahony brat Saif al-Isłam. Jon niadaŭna viarnuŭsia na radzimu paśla vučoby ŭ Hiermanii.

Havoračy słovami Pucina, Muamar Kadafi zdoleŭ u XX st. stvaryć u Livii «manarchiju novaha typu». U krainie nie pravodzilisia vybary. Usiu ŭładu kantralavaŭ sam Kadafi. Jahonyja syny zaniali hałoŭnyja pasady. Biespakaranaść Kadafi adčuvaŭ, kali za jahonaj śpinaj stajaŭ SSSR. U toj čas jon finansavaŭ terarystaŭ va ŭsim śviecie, arhanizavaŭ šerah teraktaŭ, u jakich zahinuli sotni ludziej u roznych krainach. Svaich praciŭnikaŭ unutry krainy, pieradusim isłamistaŭ, Kadafi zabivaŭ taksama sotniami. Kali pad upłyvam padziej «arabskaj viasny narodaŭ» u Tunisie, Jehipcie i Jemienie narod vyjšaŭ na vulicy i ŭ Livii, Kadafi taksama ŭžyŭ siłu. Ale hetym razam pratesty byli bolš rašučymi. U vyniku demanstracyi pieraraśli ŭ paŭstańnie, i pad kantrol apazicyi pierajšli niekalki vialikich haradoŭ.

Vyniščeńnie siłami Kadafi mirnaha nasielnictva dazvoliła Zachadu ŭmiašacca va ŭnutranyja spravy krainy. Ciapier Kadafi razyhryvaje ź siabie achviaru.

NATO nie maje na mecie źniščeńnia kankretnych asob u Livii, zajaviŭ kamandujučy vajennaj apieracyjaj «Abjadnany abaronca» hienierał-lejtenant Šarl Bušar, kamientujučy infarmacyju pra hibiel syna Kadafi.

«Usie mety NATA źjaŭlajucca vajskovymi pa svajoj pryrodzie i vyrazna źviazanyja ź sistematyčnymi napadami režymu Kadafi suprać livijskaha nasielnictva i nasielenych rajonaŭ. Kankretnyja asoby nie źjaŭlajucca našymi metami», — havorycca ŭ zajavie Bušara.

Avijaŭdar byŭ nakiravany na źniščeńnie kamandna-kantrolnaj infrastruktury sił Kadafi, skazaŭ Bušar.

Pa słovach hienierała, jon u kursie paviedamleńniaŭ ŚMI, što ŭ vyniku avijanalotaŭ, mahčyma, zahinuli niekalki členaŭ siamji Kadafi.

«My škadujem ab hibieli ŭsich ludziej, asabliva mirnych hramadzian, jakija pakutujuć u vyniku kanfliktu», — zajaviŭ Bušar.

U Bienhazi pradstaŭniki ŭrada apazicyi zajavili, što infarmacyja pra śmierć syna moža być kačkaj. Maŭlaŭ, padobnyja štučki Kadafi praktykavaŭ i ŭ minułym. Adnak šarahovyja paŭstancy vybiehli na haradski plaž, kab adznačyć navinu jak śviata.

Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH