10 maja ŭ sudzie Maskoŭskaha rajona Minska pačalisia słuchańni kryminalnaj spravy ŭ dačynieńni da byłoha advakata Michaiła Vołčaka. Jamu inkryminujuć učynieńnie złačynstva, praduhledžanaha č. 1 art. 407 KK (vydavańnie źviestak daznańnia, papiaredniaha śledstva ci zakrytaha sudovaha pasiadžeńnia).
Kryminalnaja sprava ŭ dačynieńni da Vołčaka była raspačata Hienieralnaj prakuraturaj u pačatku studzienia hetaha hoda, kali jon jašče źjaŭlaŭsia abaroncam staršaha śledčaha pa asabliva važnych spravach Hienprakuratury Śviatłany Bajkovaj.
Raspačynańnie spravy źviazana z nakiravanaj Michaiłam Vołčakam u kancy kastryčnika — pačatku listapada 2010 hoda ŭ Hienprakuraturu skarhaj na biaździejnaść orhana, jaki viadzie kryminalny praces u dačynieńni da jaho padabaronnaj. Sutnaść skarhi stała viadomaja. Jak BiełaPAN paviedamlaŭ raniej, advakat, kirujučysia źviestkami «prasłuški» KDB, jakija fihurujuć u materyjałach śledstva, u svaim zvarocie ŭ Hienprakuraturu zajaviŭ, što papiarednim śledstvam naŭmysna nie dadziena pravavaja acenka supraćpraŭnym dziejańniam aficera milicyi, jaki ŭvachodziŭ u skład śledčaj hrupy Bajkovaj.
Słuchańnie spravy Bajkovaj pačałosia ŭ Viarchoŭnym sudzie 10 sakavika. Jana abvinavačvajecca va ŭčynieńni złačynstvaŭ pavodle č. 2 art. 393 (pryciahnieńnie ŭ jakaści abvinavačanaha zaviedama nievinavataha), čč. 1, 2 art. 394 (prymus da davańnia pakazańniaŭ), čč. 1, 2 art. 397 (zaviedama niezakonnyja zatrymańnie ci źmiaščeńnie pad vartu), č. 3 art. 424 (złoŭžyvańnie ŭładaj ci słužbovymi paŭnamoctvami), č. 3 art. 426 (pieravyšeńnie ŭłady ci słužbovych paŭnamoctvaŭ) KK. Razam z Bajkovaj pa spravie prachodzić niejki Karen Vartanian. Pavodle źviestak BiełaPAN, raniej jon byŭ nieadnarazova sudzimy. Jon abvinavačvajecca va ŭčynieńni złačynstva, praduhledžanaha č. 1 art. 154 KK (katavańnie).
