U Krakavie u subotu adbyłosia šeście salidarnaści ź biełaruskim narodam. Biełaruskija studenty j ichnyja polskija kalehi prajšlisia pa centry horadu ź biełaruskimi nacyjanalnymi ściahami i transparantam «Svabodu palitviaźniam!». Šeście skončyłasia la pomniku Hrunvaldzkaj bitvie, dzie moładź zapaliła śviečki salidarnaści. Za niekalki dzion da hetaha Krakavie byli rasklejenyja płakaty ź infarmacyjaj pra Dzień biełaruskaj salidarnaści, a ŭ bujniejšaj miascovaj hazecie vyjšaŭ materyjał pryśviečany sytuacyi z pravami čałavieka na Biełarusi.
U Poznani kala pomnika paetu Adamu Mickieviču adbyŭsia mitynh, u jakim akramia biełaruskich studentaŭ pryniali ŭdzieł kala 50 aktyvistaŭ polskich Maładych Demakrataŭ i Niezaležnaha Studenckaha Prafsajuzu». Ludzi vykazali salidarnaść ź biełaruskimi palitviaźniami i zapalili bieł-čyrvoha-biełyja śviečki.
Biełastok 16 śniežnia praktyčna całkam byŭ zaklejeny płakatami ź infarmacyjaj ab tym, što šerah vyšejšych biełaruskich słužboŭcaŭ – sakratar Savieta biaśpieki Viktar Šejman, ministr unutranych spraŭ Uładzimir Navumaŭ, kamandzir śpiecnaza ŭnutranych vojskaŭ Dźmitryj Paŭličenka i były ministr unutranych spraŭ Juryj Sivakoŭ – padazrajucca mižnarodnaj supolnaściu ŭ vykradańniach i zabojstvach lideraŭ apazicyi i žurnalista. Akcyja kalinoŭcaŭ vyklikała vialiki rezanans siarod žycharoŭ Biełastoku, a interviju ź jaje arhanizatarami było pakazana pa televizii.
U Łodzi biełaruskija studenty-kalinoŭcy vyjšli ŭ centr horada z partretami palitviaźniaŭ i źnikłych palitykaŭ, bieł-čyrvona-biełymi ściahami i raściažkaj «Salidarnaść ź Biełaruśsiu».
U Pułtusku 16 śniežnia biełaruskija studenty praviali perfomans, pryśviečany da Dniu salidarnaści. Maładyja ludzi vyjšli na centralnuju płošču ŭ maskach Alaksandra Łukašenki i Uładzimira Pucina. Biełaruski narod uvasablała dziaŭčyna sa źviazanymi viaroŭkaj rukami... U Sopacie ŭ subotu prajšoŭ adkryty prahlad filma pra akcyi pratestu u Biełarusi ŭ sakaviku 2006 hoda, paśla prezidenckich vybaraŭ – «Urok biełaruskaj movy» viadomaha polskaha kinarežysera Mareka Dembińskaha.
Fotavystava, namioty, biełaruskaja muzyka, performansy, vinšavańni biełarusaŭ z Novam hodam, płenerovy pakaz filmaŭ, dy kancert hurtu «Čyrvonym pa Biełym» – tak Varšava ciaham usiaho dnia 16 śniežnia vykazvała svaju salidarnaść ź Biełaruśsiu.
Dzień Salidarnaści ŭ Varšavie raspačałosia ŭsio a 10-j hadzinie ranicy fotavystavaj, jakaja raźmiaściłasia na namiocie ŭ samym centry Varšavy. Na fotazdymkach možna było pabačyć, jak biełaruskaja apazicyja zmahajecca za svabodu i praŭdu na vuličnych akcyjach, pačynajučy ad 1996 hoda dy skončvajučy sioletašnimi vybarami. Vystavu supravadžała biełaruskaja muzyka, zabaronienaja na radzimie.
Pa vychodnych y histaryčnym centry Varšavie - a mienavita tam adbyvałasia płenerovaja vystava zdymkaŭ pra Biełaruś - vielmi šmat ekskursij i prosta turystaŭ z usiaho śvietu, tamu było šmat žadajučych pahladzieć vystavu.
Naprykancy pa plac zavitaŭ hurt «Čyrvonym pa Biełym» dy zaśpiavaŭ niekalki svaich pieśniaŭ, paśla čaho byli zapalenyja źnički la partretaŭ źnikłych dy chvilinaj maŭčańnia uzhadanyja ŭsie achviary režymu.
Fota liaska.livejournal.com. Pa spasyłcy — fotarepartaž z Dnia Salidarnaści ŭ Łodzi.
❏
Da salidarnaści z achviarami palityčnych represijaŭ u Biełarusi 16 śniežnia dałučyłasia biełaruskaja dyjaspara Maskvy. Pa tradycyi byli ŭskładzienyja biełyja i čyrvonyja kvietki da pomniku Janku Kupału, jaki zahinuŭ u Maskvie pry niavyśvietlenych abstavinach i pavodle niekatorych versijaŭ byŭ zabity savieckim KHB.
