Sudździa Vyšejšaha haspadarčaha suda Alena Majorava admoviłasia zadavolić pazoŭ Redakcyi «Našaj Nivy» da Ministerstva infarmacyi ab admienie papiaredžańnia.Nahadajem, jano było vyniesienaje za artykuł «Dziaŭčyna znachodziłasia pad zavałami, kali Łukašenka ŭskładaŭ kvietki», źmieščanym u «NN» № 14 ad 13 krasavika 2011 hoda. Mininfa ŭhledzieła ŭ im «parušeńnie hramadskich intaresaŭ» i «padryŭ davieru da orhanaŭ dziaržaŭnaj ułady, u pryvatnaści miedycynskaj i vyratavalnaj słužbaŭ».
Papiaredžańnie było trecim pa liku i stała nahodaj dla pačatku sudovaha pracesu ab likvidacyi «Našaj Nivy». Toj praces pakul spynieny, bo Redakcyja skarystałasia pravam abskardzić papiaredžańnie.
U časie suda pradstaŭniki Mininfa nastojvali, što, pavodle zakanadaŭstva, majuć prava davać papiaredžańni navat kali jość tearetyčnaja mahčymaść takoj «škody». Arhumienty Redakcyi — što ŭdakładnienaja infarmacyja źjaviłasia na sajcie i ŭ nastupnym numary «NN» vielmi apieratyŭna; što nijakich prajavaŭ «parušeńnia» i «padryvu davieru» za paŭtara miesiaca nie nazirałasia, što samo razumieńnie «hramadskich intaresaŭ» nie maje kankretnaha akreśleńnia ŭ zakanadaŭstvie — nie byli ŭziatyja sudom pad uvahu.
Redakcyja budzie abskardžvać prysud u kasacyjnaj instancyi Vyšejšaha haspadarčaha suda.
