Lidar Abjadnanaj hramadzianskaj partyi Anatol Labiedźka kaža, što ŭ bližejšy čas moža być abvieščana ab novym abjadnańni ŭnutry apazicyi.
«Naša Niva»: Na čym hruntujucca Vašy vysnovy?
Anatol Labiedźka: Na šmatlikich dvuchbakovych i šmatbakovych razmovach i kansultacyjach. Na heta jość palityčnaja vola i žadańnie. Havorka idzie pra kaardynacyju i ŭzajemadziejańnie ŭnutry apazicyi. Treba tolki aformić heta. Ni adna surjoznaja palityčnaja siła nie suprać hetaha.
«NN»: A jaki budzie farmat? Sustaršynstva ci adziny lidar?
AŁ: Rana pra heta jašče havaryć. Treba skłaści ŭsie tyja mahčymaści, što my majem na siońniašni dzień. Potym vyznačymsia, jaki heta budzie farmat. Mnie zdajecca, što novaje ŭtvareńnie pavinna być šmatuzroŭnievaj kanfihuracyi. Z adnaho boku pavinny być palityčnyja partyi, ruchi, arhanizacyi. Ź inšaha — ekśpiertnaja supolnaść, niejkija rabočyja hrupy. U pryncypie, takoje ŭ nas užo było, kali vypracoŭvali Małuju Kanstytucyju. Pra lidara pakul nichto nie havaryŭ. Ambicyi ciapier u ludziej nie lezuć praz kraj. Niekatoryja ludzi zrazumieli, što lidarstva heta nie tolki intervju i śviatło safitaŭ, ale i adkaznaść, nastupstvy. Lidar pavinien być abrany pry vialikaj kolkaści ludziej. Mahčyma, kab u hetaj pracedury zmoh paŭdzielničać kožny hramadzianin krainy.
«NN»: Raniej raźmiežavańnie ŭ apazicyi časta prachodziła pa linii «prazachodni — pramaskoŭski». Ciapier hetaja prablema isnuje?
AŁ: Nie adčuvałasia. Prynamsi, niejkich umovaŭ, što ja nie pryjdu na pieramovy, kali tam budzie prarasijski/prajeŭrapiejski palityk nie było. Dla mianie takoj prablemy nie isnavała ŭvohule nikoli. Zdajecca, što my pieražyli hetuju chvarobu. Ciapier ludźmi ruchaje žadańnie, što my možam zrabić dla krainy.
«NN»: Nakont farmata ŭdziełu ŭ parłamienckich vybarach užo kansultavalisia?
AŁ: Usie sychodziacca ŭ mierkavańni, što najlepšym rašeńniem budzie ahulnaje. Niezaležna ad taho, ci heta budzie bajkot, ci ŭdzieł, ci niejkaja bolš składanaja schiema.
«NN»: Kali pra novaje abjadnańnie moža być zajaŭlena?
AŁ: Patrebien adziny pasył, ź jakim my mahli b vystupić. Tym nie mienš, usie sychodziacca ŭ mierkavańni, što zrabić heta treba da letnich kanikuł i adpačynkaŭ. Heta značyć ciaham bližejšych tydniaŭ.
