Biuro kryminalnaj palicyi Litvy i Vilenskaja akruhovaja prakuratura nanieśli ŭdar pa złačynnaj hrupoŭcy, jakaja pierapraŭlała ŭ Biełaruś skradzienyja za miažoj aŭtamabili. Za kratami apynulisia 6 padazravanych. Siarod ich i pamiežnik KPP u Miedzininkai (Miedniki).
Miarkujecca, što členy hrupoŭki paśpieli pierapravić ź Litvy ŭ Biełaruś nie adnu sotniu paraŭnalna novych aŭto z padroblenymi dakumientami. Škoda aceńvajecca ŭ miljony dalaraŭ.
Členy hrupoŭki trapilisia z dokazami - u Biełaruś praz KPP u Miedzininkai jany sprabavali pierapravić, jak padazrajecca, dva ŭhnanyja ŭ Niamieččynie aŭtamabili BMW X5 i BMW X6. Pavodle papiarednich źviestak, hetyja mašyny syšli z kanviejera hod tamu.
Jak skazaŭ prakuror Vilenskaj akruhovaj prakuratury Nieryjus Puškorys, padazravanyja byli zatrymanyja ŭ vyniku sakretnaj apieracyi ŭ noč ź piatnicy na subotu pry sprobie vyvazu aŭtamabilaŭ.
Pamiežnik, jaki dapamahaŭ padazravanym, jak raz toj nočču dziažuryŭ na KPP u Miedzininkaj. Pradstaŭniki orhanaŭ pravaachovy nie sumniavajucca, što za hetuju dapamohu jon atrymlivaŭ ščodruju ŭznaharodu.
Vilenski sud u niadzielu dazvoliŭ ŭziać padazravanych pad aryšt na termin ad 1 da 3 miesiacaŭ.
Siarod ich - 3 hramadzian Biełarusi.
Miarkujecca, što členy hrupoŭki zhaniali aŭtamabili ŭ Hiermanii - ź Litvy vyvozilisia tolki darahija aŭto ź pierabitymi identyfikacyjnymi numarami i padroblenymi dakumientami.
Pa słovach N. Puškorusa, banda mahła dziejničać na praciahu niekalkich hadoŭ.
Za padazravanymi niekatory čas tajemna sačyli.Sačeńnie sankcyjanavaŭ sudździa. Taksama viałasia zdymka pracy pamiežnikaŭ schavanaj kamieraj.
Nie vyklučajecca, što ŭ bližejšy čas budzie zatrymana bolš padazravanych.
