Da Narodnaha schodu zastałosia try miesiacy. Jon projdzie ŭ subotu 8 kastryčnika.U mai hetuju ideju ahučyli pradstaŭniki niezaležnych prafsajuzaŭ, AHP, partyi levych «Spraviadlivy śviet», niezarehistravanaj partyi «Biełaruski ruch», «Havary praŭdu» i BSDP.
Siarod patrabavańniaŭ Narodnaha schoda: spynieńnie rosta cenaŭ, zabiaśpiečyć hodnyja zarobki i piensii, mahčymaść abmienu valuty, nie dapuścić biespracoŭja, spynić prodaž pradpryjemstvaŭ, harantavać svabodnuju pracu niezaležnym ŚMI, rassakrecić prezidencki fond.
Na siońnia było abvieščana, što arhkamitety pa padrychtoŭcy Narodnaha schodu prajšli nie tolki ŭ Minsku, ale i ŭ dvaccaci haradach krainy.
«Ideja Narodnaha schodu vyklikaje žyvuju cikavaść, bo ŭzrovień žyćcia nie prosta ŭpaŭ, a abrynuŭsia, — kaža Alaksandr Miech z Kobryna. — U kancy žniŭnia rabočyja pradpryjemstvaŭ horada abiacali nam dać nam svaich pradstaŭnikoŭ u arhkamitet».
«U nas usie płasty hramadstva pačynajuć abjadnoŭvacca», — kaža Jaŭhien Kanstancinaŭ z Navapołacka.
Pradstaŭnik prafsajuzu radyjoelektronnaj pramysłovaści Mikałaj Pachabaŭ raskazvaje, što ŭžo zaraz na pradpryjemstvach Minskaj vobłaści było raspaŭsiudžana 10 tysiač ulotak «Nie — žabractvu narodu». Pa jahonych słovach, heta znachodzić vodhuk rabočych.
Pavodle Pachabava, ludzi na zavodach adkryta aburajucca toj situacyi, što zaraz u krainie. U niekatorych miescach rychtujucca italjanskija zabastoŭki, kali pracaŭniki ŭsio robiać vielmi marudna. «Pakul što ludzi nie hatovyja vyviernuć kašulu i pajści na akcyju, ale da vosieni nastroi pačnuć mianiacca».
Hienadź Ramaniuk pracuje na «Biełaruśkalii», jon kaža, što pratestnyja nastroi na pradpryjemstvie taksama rastuć. «Ludziej chočać załahodzić premijami, rostam zarobkaŭ, ale heta nie tyja hrošy, jakija jany atrymlivali raniej».
Na pytańnie, ci nie varta siabram arhkamiteta zaklikać svaich prychilnikaŭ prychodzić na płoščy biełaruskich haradoŭ štotydzień, a nie čakać try miesiacy, byŭ nastupny adkaz Viktara Ivaškieviča.
«Niekalki tysiač čałaviek jašče nie mohuć pierałamać situacyju.
Situacyja moža źmianicca, kali nas budzie ŭ 10–20 razoŭ bolej. Takoha efiektu nielha dasiahnuć adnymi zaklikami ŭ sacyjalnych sietkach „ŠOS“, ci „Dałoŭ Łukašenku“. Hetaha mała. Patrebnaja vialikaja tłumačalnaja praca. Na chłapok heta nie atrymajecca», — kaža Ivaškievič.
Jon miarkuje, što ludzi jašče nie zusim da kanca adčuli prajavy kryzisa. Sapraŭdnaje ŭśviedamleńnie pryjdzie tolki vosieńniu.
Ivaškievič havoryć, što na ŭsie ŭlotki da Narodnaha schodu nie było vydzielena ni centa zamiežnymi fundacyjami, «usio vychodzić na narodnyja hrošy». Dla praviadzieńnia schodaŭ arhanizatary buduć prasić dazvolenyja miascovymi ŭładami placoŭki dla praviadzieńnia vuličnych akcyj.
Darečy, u internecie pracu pačaŭ admysłovy sajt Narodnaha schodu, dzie možna znajści ŭsiu infarmacyju.
