Mirasłaŭ Łajčak, vysoki pradstaŭnik Eŭrapiejskaj słužby zamiežnapalityčnaj dziejnaści, vykazaŭ upeŭnienaść, što sankcyi, uviedzienyja Eŭraźviazam u adnosinach da pradstaŭnikoŭ aficyjnaha Miensku, prynosiać plon.
Na dumku Łajčaka, apošnija akcyi maŭklivaha pratestu ŭ Biełarusi śviedčać, što Alaksandar Łukašenka tracić svoj tatalny kantrol nad krainaju:
«Heta daje nam vielmi jasny syhnał, što režym tracić kantrol. Jano vidać, u pryvatnaści, z taho, što apošnija demanstracyi nie byli abumoŭlenyja palityčnymi matyvami, a byli vyklikanyja ciažkim ekanamičnym i sacyjalnym stanoviščam ludziej. Voś ža toje, što adbyvajecca ciapier u Biełarusi, maje vialikaje značeńnie».
Ź letašniaha śniežnia Mirasłaŭ Łajčak zajmaje pasadu
Na siońniašni dzień u śpis pradstaŭnikoŭ aficyjnaha Miensku, na jakich pašyrajucca vizavyja i finansavyja sankcyi Eŭraźviazu, uklučanyja 193 čałavieki i 3 jurydyčnyja asoby.
Łajčak admoviŭsia spekulavać na temu,
ci dapoŭniać ministry zamiežnych spravaŭ krain Eŭrapiejskaha Źviazu nazvany śpis — u adkaz na represii ŭładaŭ Biełarusi ŭ adnosinach da ŭdzielnikaŭ maŭklivych pratestaŭ:
«Ja dumaju, pryniatyja miery pracujuć. Heta pryznajuć demakratyčnyja siły ŭ Biełarusi. Heta miery, jakija nie dajuć vynikaŭ adrazu, ale niama sumnievu, što jany prynosiać plon. Niama sumnievu, što režym vielmi dobra razumieje i adčuvaje ŭsie hetyja miery. My starajemsia, kab našyja pasłańni režymu ŭ Miensku byli hranična jasnyja. My nia budziem mieć ź im dačynieńniaŭ da času, pakul jon nia vyzvalić i nie reabilituje ŭsich palityčnych viaźniaŭ».
Łajčak taksama adreahavaŭ na niadaŭnija słovy Alaksandra Łukašenki pra hatovaść vysłać usich biełaruskich palitviaźniaŭ u Eŭrapiejski Źviaz:
«My pryzvyčailisia da dziŭnych, śmiešnych, niesurjoznych Łukašenkavych zajavaŭ, i hetaja zajava — adna z takich. My chočam narmalizacyi sytuacyi ŭ Biełarusi i pavahi da eŭrapiejskich kaštoŭnaściaŭ, da zakonu, da pravoŭ, jakija harantavanyja hramadzianam Biełarusi ich kanstytucyjaj, adnak nie zabiaśpiečvajucca ŭ realnym žyćci. Havorka nie pra toje, što Eŭrapiejski Źviaz choča zabrać tuju ci inšuju asobu i pryniać jaje na našaj terytoryi, havorka pra toje, kab palepšyć umovy dla žyćcia ludziej u Biełarusi. Takich syhnałaŭ i znakaŭ my čakajem ad Miensku, ale dasiul nie atrymlivajem».
Eŭrapiejskaja słužba zamiežnapalityčnaj dziejnaści pakul što ŭstrymlivajecca ad dalejšych abmiežavalnych zachadaŭ u adnosinach da aficyjnaha Miensku, u pryvatnaści ad vyklučeńnia Biełarusi z prahramy «Ŭschodniaje partnerstva». Mirasłaŭ Łajčak padkreśliŭ, što pry kožnym nastupnym kroku z boku Eŭraźviazu treba ŭličvać uździejańnie, jakoje jon moža mieć dla biełaruskaha žycharstva:
«Pry našych namahańniach my starajemsia dakładna vyviarać padychody, kab być ćviordymi ŭ adnosinach da režymu i da tych, chto asabista biare ŭdzieł u antydemakratyčnych dziejańniach, i ŭ toj ža čas nie pakarać nievinavatych hramadzianaŭ, nie adkaznych za toje, što adbyvajecca. Voś ža ŭsie prapanovy, jakija my razhladajem, aceńvajucca mienavita z hetaj perspektyvy».
