Čałaviečych achviaraŭ niama, ale niezavieršany ab»iekt nie ŭžo padlahaje adnaŭleńniu. Pavodle papiarednich vysnoŭ admysłoŭcaŭ, straty ŭ hrašovym vymiareńni składajuć kala vaśmi miljardaŭ rubloŭ.
Dziela vyśviatleńnia pryčynaŭ avaryi stvorana admysłovaja kamisija, jakaja aficyjna raspačnie svaju pracu zaŭtra, a siońnia ŭ Viciebsk pryjazžaŭ ministr transpartu i kamunikacyj Uładzimier Sasnoŭski.
Defarmacyja mosta pačałasia ŭčora a pałovie na 5‑iu viečara, pa skančeńni pracoŭnaje źmieny. Siońnia, kali jon praktyčna abrynuŭsia ŭ Zachodniuju Dźvinu, nabližacca da miesca zdareńnia i šyroka aśviatlać hetuju padzieju nie dazvalajuć navat žurnalistam dziaržaŭnych srodkaŭ masavaje infarmacyi.
Hety most u rajonie vioski Kamary Viciebskaha rajonu planavali adčynić da čarhovaha «Słavianskaha bazaru» – u lipieni 2007‑ha hodu. Jon musiŭ stacca častkaj kalcavoj darohi, jakaja ciapier budujecca vakoł abłasnoha centru. Pavodle źviestak, atrymanych ad budaŭnikoŭ, most uzvodziŭsia pa technalohii, jakaja apraboŭvałasia na Biełarusi ŭpieršyniu. Aprača Viciebsku, užo była raspačataja padrychtoŭka da budaŭnictva padobnaha mostu ŭ Vierchniadźvinsku, potym pa takoj samaj technalohii mierkavałasia pabudavać most na Homielščynie. Adnak paśla nadzvyčajnaha zdareńnia, aficyjnaj movaju apisanaha jak «samaadvolnaja defarmacyja kanstruktyŭnaha elemientu» los i hetaha, i padobnych zbudavańniaŭ zastajecca niavyrašanym.
