Respublika Biełaruś nie spyniała prapampoŭvańnie nafty pa svajoj terytoryi tranzitam u trecija dziaržavy. Ab hetym zajaviŭ BIEŁTA načalnik upraŭleńnia infarmacyi ‑ pres‑sakratar MZS Andrej Papoŭ, kamiencirujučy paviedamleńni ab prablemach z pastaŭkami rasijskaj nafty tranzitam praź Biełaruś u trecija krainy.
Jon adznačyŭ, što cisk na ŭvachodzie naftapravoda «Družba» na terytoryi Biełarusi byŭ panižany nie pa vinie biełaruskaha boku.
Pradstaŭnik MZS nahadaŭ taksama, što Respublika Biełaruś ‑ ułaśnik mahistralnych naftapravodaŭ, jakija prachodziać pa jaje terytoryi. Zychodziačy z hetaha, urad krainy pastanovaj ad 31 śniežnia 2006 hoda numar 1798 uvioŭ mytnaje afarmleńnie nafty, što pieramiaščajecca praz terytoryju Respubliki Biełaruś mahistralnym naftapravodam. Pošlina, uviedzienaja hetaj pastanovaj, ujaŭlaje saboj zbor za transparciroŭku nafty i nie źjaŭlajecca mytnym płaciažom. Hety zbor byŭ uviedzieny ŭ suviazi ź dziejańniami ŭrada Rasii, jaki 8 śniežnia 2006 hoda ŭ adnabakovym paradku biez naležnaha paviedamleńnia Respublicy Biełaruś pryniaŭ pastanovu, u adpaviednaści ź jakoj z 1 studzienia 2007 hoda na naftu, što pastaŭlajecca ŭ respubliku, uviedziena vyvaznaja mytnaja pošlina. Tym samym Rasijskaja Fiederacyja parušyła šerah jak dvuch‑, tak i šmatbakovych pahadnieńniaŭ ab niespahnańni mytnych pošlin va ŭzajemnym handli.
Takija adnabakovyja dziejańni rasijskaha boku, akramia parušeńnia norm mižnarodnaha prava, razburyli stałyja kamiercyjnyja suviazi i istotna pahoršyli ekanamičnaje stanovišča naftapierapracoŭčaj haliny Biełarusi.
Urad Biełarusi vymušany byŭ pryniać miery pa praduchileńniu naniasieńnia ekanamičnaha ŭronu i uźniknieńnia deficytu važniejšych paliŭna‑enierhietyčnych resursaŭ. Biełaruski bok nieadnarazova paviedamlaŭ rasijskamu boku ab hatoŭnaści pačać pierahavory pa pytańniach pastavak nafty ŭ Jeŭropu. Rasijskamu boku viadoma, što Biełaruś hatova vieści kanstruktyŭny dyjałoh pa ŭrehulavańniu pytańniaŭ pastavak nafty ŭ respubliku, až da admieny ŭviedzienych kampiensujučych mier pry ŭstaranieńni pryčyn, što ich sparadzili, padkreśliŭ pradstaŭnik MZS. ‑e
