Advakaty Darja Lipkina i Hanna Bachcina, jakija abaraniali fihurantaŭ kryminalnaj spravy ab masavych biesparadkach 19 śniežnia Mikitu Lichavida i Irynu Chalip adpaviedna, prajšli pieraatestacyju Ministerstva justycyi.
Nahadajem,
26 lipienia Lipkina i Bachcina nie prajšli pazačarhovuju atestacyju, jakuju pravodziła terytaryjalnaja atestacyjnaja kamisija.Abodva advakaty tady zajavili, što majuć namier adstojvać svajo prava na prafiesijnuju dziejnaść. Pry hetym Lipkina adznačyła: terytaryjalnaja atestacyjnaja kamisija nie maje prava spyniać dziejańnie advakackaj licenzii — takimi paŭnamoctvami nadzielena tolki kvalifikacyjnaja kamisija pry Ministerstvie justycyi.
Pasiadžeńnie kvalifikacyjnaj kamisii Miniusta adbyłosia 4 žniŭnia. Na joj pytańnie ab adpaviednaści advakataŭ prafiesijnym patrabavańniam i razhladałasia zanava, biezadnosna da rašeńnia terytaryjalnaj atestacyjnaj kamisii. «Kvalifikacyjnaja kamisija pryniała rašeńnie, jakoje ja liču zakonnym i abhruntavanym, jakoje paćvierdziła maju kvalifikacyju i dało mnie mahčymaść dalej pracavać», — skazała Lipkina.
30 lipienia biełaruskija pravaabaroncy nakiravali zvarot śpiecyjalnamu dakładčyku AAN pa pytańni niezaležnaści sudździaŭ i advakataŭ Habryele Knaŭl, u jakim vykazali zaniepakojenaść niaspynnym uciskam na advakackuju supolnaść Biełarusi.
U lutym Miniust pazbaviŭ licenzij čatyroch advakataŭ Minskaj haradskoj kalehii advakataŭ — Aleha Ahiejeva, Taćcianu Ahiejevu, Uładzimira Tołścika i Tamaru Harajevu, jakija abaraniali fihurantaŭ spravy ab masavych biesparadkach u Minsku 19 śniežnia. 6 sakavika sa składu kalehii byŭ vyklučany advakat Pavieł Sapiełka.
