Sutyčki z palicyjaj i maradziorstva raspaŭsiudžvajuca na novyja rajony brytanskaj stalicy.
Jašče ŭ adnym rajonie Łondana, Chakni, u paniadziełak adbyvajucca sutyknieńni pamiž hrupami moładzi i palicyjaj.
U Chakni, raźmieščanym niedaloka ad centra brytanskaj stalicy, maładyja ludzi bjuć vokny mahazinaŭ i restaranaŭ. Palicyja zabłakavała niekalki vulic.
Jak paviedamlajecca, sutyčki ź siłami pravaparadku pačalisia paśla taho, jak palicyja spyniła adnaho ź junakoŭ, kab abšukać jaho.
U noč na 8 žniŭnia biesparadki i padpały adbylisia ŭ roznych častkach brytanskaj stalicy — u Enfiłdzie na poŭnačy Łondana, Brykstanie na poŭdni i na Oksfard-stryt, centralnaj handlovaj vulicy.
Ministr unutranych spraŭ Brytanii Tereza Mej praviała ekstranuju naradu z kiraŭnikami łondanskaj palicyi, dzie zajaviła, što aktam hvałtu nie moža być nijakaha apraŭdańnia.
Mej zaklikała rajonnyja saviety i žycharoŭ supracoŭničać z palicyjaj, kab «pryciahnuć złačyncaŭ da adkaznaści».
Za dva dni biesparadkaŭ bolš za 100 čałaviek aryštavana, 35 palicejskich paraniena. Spalena niekalki damoŭ i aŭtamabilaŭ.
Uśled za paŭnočnymi rajonami Łondana ŭ noč na paniadziełak adbylisia pahromy i padpały ŭ Brykstanie, na poŭdni brytanskaj stalicy. Adna abutkovaja krama była padpalenaja, niekalki mahazinaŭ abrabavanyja.
Kala 50 padletkaŭ hramili kramy na Oksfardskaj płoščy, u handlovym centry brytanskaj stalicy. Pa słovach palicyi, zavadatarami biesparadkaŭ źjaŭlajucca hrupy moładzi.
Vice-premjer brytanskaha ŭrada Nik Kleh žorstka asudziŭ dziejańni chulihanaŭ.
U roznych rajonach Łondana byli ździejśnienyja napady na palicyjantaŭ, paškodžany palicejskija aŭtamabili.
Pastupajuć paviedamleńni ab tym, što hrupa z 200 padletkaŭ, jakija zajmalisia maradziorstvam, sprabavała dahnać palicejskich na adnoj z vulic Brykstana.
Biesparadki ŭ Totenchemie pačalisia ŭ subbotu, kali 300 čałaviek sabralisia la palicejskaha ŭčastka, kab vyśvietlić, jak idzie rasśledavańnie hibieli 29-hadovaha Marka Dahana, zastrelenaha palicyjantam 4 žniŭnia.
U chodzie zdareńnia palicejski, jaki zastreliŭ Dahana, taksama atrymaŭ ranieńnie, pryčym, jak śćviardžaje palicyja, pieršym streliŭ małady čałaviek.