Jak budzie vyhladać pieršaje muzyčnaje śviata Biełarusi.
Kali b u BSSR pravodzilisia padobnyja śviaty, to vyhladali b jany pryblizna hetaksama.
Biełaruskija muzyki z zajzdraściu hladzieli na susiedniuju Litvu, dzie štohod 1 maja, zamiest Dnia salidarnaści pracoŭnych, adznačajecca inšaje śviata: paru tysiač vuličnych muzykantaŭ vychodziać na vulicy i radujuć minakoŭ svajoj ci čužoj tvorčaściu. I voś, adbyłasia. Na Dzień horada ŭ Minsku adbudziecca pieršy biełaruski Dzień vuličnaj muzyki.
Čatyry prostyja praviły
Pieršaja radaść ad naviny prajšła paśla taho, jak daviałosia aznajomicca z praviłami Dnia. Praviła pieršaje — nijakaj palityki. Moža jano i dobra, ale jak zrazumieć tuju tonkuju hrań, za jakoj arhanizatary śviata buduć bačyć palityku. Naprykład, adsotkaŭ piaćdziesiat biełaruskich vuličnych muzykantaŭ vykonvajuć pieśni Coja. I što rabić u takoj situacyi? Jak byccam Coj amal sinonim «vuličnaj muzyki», a ź niadaŭniaha času i nielha jaho śpiavać, i pa radyjo słuchać. Zajaŭku ź pieśniaj «Pieriemien!» aŭtarstva V. Coja prapuściać, ci nie? Jak śmiajucca muzykanty, u Biełarusi za pierakład «Śpiarša biarem Mancheten» Leanarda Koena možna sutki atrymać.
Praviła druhoje. Pry padačy zajaŭki, «Vy abaviazvajeciesia ažyćciaŭlać tvorčuju dziejnaść u pryznačanym Vam i Vašamu kalektyvu miescy ŭ pryznačany Vam čas».Robicca heta dla taho, kab słuchačy mahli ź lohkaściu znajści svaich muzykaŭ, a tyja nie raspačynali skandały pamiž saboj. Adnak spałučeńnie «ažyćciaŭlać tvorčuju dziejnaść» niejak mała asacyjujecca sa śviatam.
Praviła treciaje — talerantnaje staŭleńnie da inšych muzykaŭ.
I, ŭ rešcie rešt, čaćviortaje — vašy dziejańni nie pavinny supiarečyć Zakonu Respubliki Biełaruś.
Karotki źmiest pieśni
Usio pieraličanaje vyšej možna nazvać prydzirkaj da słovaŭ i terminaŭ, adnak paśla praviłaŭ idzie ankieta, jakuju musić zapoŭnić patencyjny ŭdzielnik. Darečy, zapoŭnić jaje možna na troch movach: biełaruskaj, ruskaj , i anhlijskaj.
I voś na fonie hetaj ankiety stanovicca vidavočnym i ŭsia astatniaja sistema arhanizacyi śviata.
Asabliva heta datyčycca «Prahramy ŭdziełu». U joj piać punktaŭ. Miarkujučy pa ŭsim, kožny vykanaŭca abo kalektyŭ maje prava syhrać piać kampazicyj. A ciapier kryteryi: aŭtar, nazva, čas hučańnia. I hałoŭnaje — karotki źmiest (nie mienš za 30 słovaŭ). Kali majecca na ŭvazie ŭsio ž taki pieśnia, to jak možna pieradać u 30 słovach jaje karotki źmiest (kali heta nie pieśnia pra «Lenin taki małady»)? A što rabić tym, chto hraje instrumientalnyja kampazicyi? Nie mienš za tryccać jakich słovaŭ tudy ŭpisvać? «Spačatku do-mažor, paśla fa-mažor, za im minornaje arpiedžya ŭ la»? Sa stanoŭčaha ŭ ankiecie — prapanova dadatkovaj aparatury dla kožnaha.
A ŭ kancy pamiatka. «Adpraŭlajučy zajaŭku na razhlad, Vy zhadžajeciesia z umovami praviadzieńnia “Śviata vuličnaj muzyki — 2011”, aznajomlenyja z pałažeńniem i ŭmovami praviadzieńnia, a hetak ža z zakonam “Ab masavych mierapryjemstvach u Respublicy Biełaruś”, zakonam Respubliki Biełaruś “Ab aŭtarskim pravie i sumiežnych pravach” i niesiacie adkaznaść za zachavańnie normaŭ hramadskaha paradku, vykanańnie kampazicyj u adpaviednaści z zakanadaŭstvam Respubliki Biełaruś».
A vy zmahli b vykanać, skažam, što-niebudź z The Rolling Stones u adpaviednaści z zakanadaŭstvam?
Adnak jość va ŭsim hetym i stanoŭčy momant — budzie i ŭ na našaj vulicy Dzień muzyki, pra jaki my daŭno kazali. Pry čym nie zvyčajny, a naš — tak by mović sa śpiecyfikaj našaj vulicy.
Aznajomicca z umovami i dasłać zajaŭku na ŭdzieł možna na aficyjnym sajcie www.streetmusic.by
