Ale kali va Usienarodnym schodzie 8 kastryčnika ŭziać udzieł zmoža kožny, to ŭ łukašenkaŭskim — delehaty.
Biełaruskija ŭłady ŭ minułyja vychadnyja pačali padrychtoŭku da praviadzieńnia łajalnaha da Łukašenki Usiebiełaruskaha źjezda patryjatyčnych sił. Heta pavinna stać adkazam Usiebiełaruskamu narodnamu schodu, jaki rychtujuć demakratyčnyja siły.
Źjezd rychtujecca pad patranažam kiraŭnika administracyi prezidenta Uładzimira Makieja. Čynoŭniki na miescach užo razasłali kiraŭnikam praŭładnych niekamiercyjnych hramadskich arhanizacyj i palityčnych partyj cyrkular, u jakim prapanujecca padpisacca pad «Pahadnieńniem ab stvareńni inicyjatyŭnaj hrupy».
U dakumiencie havorycca, što padpisanty, «vykazvajučy hatoŭnaść uziać na siabie adkaznaść — za siabie, za svaju siamju, svoj dom, svoj horad, svaju krainu, uśviedamlajučy adkaznaść pierad šmatnacyjanalnym narodam Respubliki Biełaruś, pryniali rašeńnie stvaryć inicyjatyŭnuju hrupu pa padrychtoŭcy i praviadzieńni Usiebiełaruskaha źjezda patryjatyčnych sił».
U Minsku nie chavajuć, što pačyn uładaŭ staŭ adkazam na płany biełaruskich demakratyčnych siłaŭ sklikać u kastryčniku Usiebiełaruski narodny schod.
