Upraŭleńnie departamienta finansavych rasśledavańniaŭ (UDFR) Kamiteta dziaržkantrolu pa Minskaj vobłaści i Minsku nie zadavoliła nivodnaje z chadajnictvaŭ ab źmianieńni miery strymańnia ŭ dačynieńni da pravaabaronca Alesia Bialackaha sa źniavoleńnia pad vartu na vyzvaleńnie pad asabistaje paručycielstva.
Adpaviedny adkaz atrymała kiraŭnictva RHA «Biełaruski Chielsinkski kamitet» (BCHK), jakoje centralizavana źbirała paručycielstvy.
Za vyzvaleńnie Bialackaha było padadziena kala 600 chadajnictvaŭ biełaruskich hramadzian i aŭtarytetnych zamiežnych dziejačaŭ. Jak paviedamiŭ kiraŭnik jurydyčnaj kamisii BCHK Hary Pahaniajła, svaju admovu śledčy UDFR tłumačyć tym, što «padstavaŭ dla źmianieńnia hetaj miery strymańnia niama».
«Takaja matyvacyja nas zadavolić nie moža, my nie ličym jaje zakonnaj. Hetaja pastanova pryniata biez padstavaŭ i biez matyvacyj rašeńnia.
Na jaho dumku, heta pakazvaje, što Bialacki — «čarhovy zakładnik ułady».
«Jana takim čynam sprabuje prademanstravać, što budzie z pravaabaroncami, hramadskimi aktyvistami i aktyvistami palityčnych partyj, jakija nie spyniać svaju dziejnaść»,— ličyć Pahaniajła.
Niahledziačy na admovu UDFR, kalehi Bialackaha majuć namier praciahvać zbor chadajnictvaŭ za jaho vyzvaleńnie. Jak paviedamiŭ BiełaPAN pravaabaronca Uładzimir Łabkovič, zhodna z zakonam padavać chadajnictvy z asabistym paručycielstvam možna da suda. «My razhladajem hetuju kampaniju nie tolki jak mahčymaść vyzvalić Bialackaha, ale i jak prajaŭleńnie salidarnaści ź im», — padkreśliŭ Łabkovič.
Aryšt Bialackaha vyklikaŭ šyroki rezanans. Vyzvaleńnia pravaabaroncy zapatrabavali kiraŭnictva Jeŭrasajuza, ZŠA i inšych dziaržaŭ, mižnarodnyja pravaabarončyja struktury, viadomyja hramadskija dziejačy i palityki.
