Ad Redakcyi. Andrej Suzdalcaŭ viadomy pracaj u jakaści analityka peŭnych rasiejskich karparacyj. Jak hramadzianin Rasiei, jon byŭ departavany ź Biełarusi na pačatku hetaha hodu. Jahonyja padliki nie pazbaŭleny pamyłak. Hetak, A.Suzdalcaŭ navat zabyvajecca ŭličyć, što Biełaruś sama zdabyvaje 1,8 młn ton nafty. Tym nia mienš, my paličyli artykuł vartym pieradrukavańnia, bo jon adlustroŭvaje pazycyju finansavych i palityčnych kołaŭ Rasiei, tłumačyć, dla čaho jany pajšli na padpisańnie pahadnieńniaŭ u Maskvie i jak jany buduć padychodzić da interpretacyi hetych dakumentaŭ.
Biełaruskija ŚMI aktyŭna radujucca «pieramozie» A.Łukašenki ŭ Maskvie. Davajcie padrachujem pahadnieńnie na 2007 h., śviadoma nie zahladajučy ŭ nastupnyja hady, bo Rasieja ŭžo pry kancy 2007-ha budzie ŭ SHA i ŭsie pahadnieńni z RB buduć pierahledžanyja. Takim čynam:
1. Umovy pahadnieńnia ad 12.01.07: vyvaznoje rasiejskaje myta – 53 USD na 2007 hod. Adkul uziałasia hetaja ličba? Dla Biełarusi budzie prymianiacca kaeficyjent u pamiery 0,293 da staŭki ahulnaha ekspartnaha myta na naftu, što składaje kala $180 za tonu. Pry hetym staŭka ahulnaha myta pieraličvajecca raz na dva miesiacy, adnak kaeficyjent 0,293 na 2007 hod zastaniecca niaźmiennym. U 2008 hodzie hety kaeficyjent składzie 0,335, u 2009 hodzie — 0,356. Voś i atrymlivajem ad 180 USD vynikovyja 53 USD.
Ale dalej – jašče cikaviej. Kali biełarusy vyviezuć z Rasiei naftu, zapłaciać 53 USD za kožnuju jaje tonu (u 2007 h.) i pasprabujuć adpravić hetuju naftu dalej na Zachad, h.zn. pierapradać, to na miažy RB i EZ myta ŭžo ŭstaloŭvajecca pa 180 USD za tonu i 108 USD za tonu naftapraduktaŭ. Adpaviedna z padpisanym pahadnieńniem pra miery pa ŭrehulavańni handlova-ekanamičnaha supracoŭnictva ŭ sfery ekspartu nafty i naftapraduktaŭ, u 2007 hodzie Rasieja budzie atrymlivać 70% myta, a Biełaruś — 30%, u 2008 hodzie — adpaviedna 80% i 20%, u 2009 hodzie — 85% i 15%. Pieraličvajem: na zachodniaj miažy za tonu rasiejskaj nafty, što idzie na reekspart, biełarusam daviadziecca addać u rasiejski biudžet 126 USD za tonu i 75,6 USD za tonu naftapraduktaŭ. U hetym vypadku, chutčej za ŭsio, užo zapłačanyja 53 USD buduć zaličanyja. Jość i ŭmova: kali biełarusy zatrymlivajuć płaciažy ŭ rasiejski biudžet – imhnienna na ekspart nafty ŭ RB uvodziacca standartnyja myty.
Spačatku paličym, kolki zekanomili biełarusy na rasiejskaj nafcie ŭ 2006 hodzie. Vyvaznoje myta na syruju naftu z RF u 2007 h. – 180 USD/t. Biełaruś vyviezła z RF (hruba) 21 młn. tonaŭ syroj nafty, nie pieraličyŭšy ŭ biudžet RF 3780 młn. USD. Heta ekanomija. Jość jašče dachod ad prodažu naftapraduktaŭ i za reekspart syroj nafty. Usiaho – kala 6 młrd. USD – 17% VUP. Niabłaha, a kali jašče ŭličyć z ekanomijaj za haz, dyk navat dziŭna, čamu ŭ Biełarusi nie pabudavali pa «Ałmazie viedaŭ» u kožnym rajonnym centry?
A što zapłacić Biełaruś ciapier?
2. U 2007 hodzie, kali Biełaruś uviazie z Rasiei ŭvieś abjom zaplanavanaj nafty – 21 młn. tonaŭ, to jana pakinie ŭ rasiejskim biudžecie 1113 młn USD. Možna ličyć, što hetyja hrošy syšli… Zatoje ŭ krainie — 21 młn. tonaŭ apłačanaj syroj nafty. Voś tut pačynajucca adkryćci… Aŭtar hetych radkoŭ druhoje dziesiacihodździe naiŭna ličyŭ, što ŭnutranyja patreby RB u syroj nafcie składajuć 7,5 – 8 młn. tonaŭ. Raptam 12 studzienia na pieramovach Maskvie biełaruskaja delehacyja zajaŭlaje, što, akazvajecca, unutranyja patreby RB – 4 młn. tonaŭ. Akazvajecca, Miensk hadami pierad Maskvoj łamaŭ kamedyju, vyprošvajučy na «braterski biełaruski narod» udvaja bolej za jahonyja patreby. Dobra, pavierym biełaruskaj delehacyi…
Ličym dalej: 21 młn. tonaŭ minus 4 młn. tonaŭ na ŭnutrany rynak. Zastajecca dla ekspartu – 17 młn. tonaŭ. Kali ŭvieś hety abjom RB adpravić bieź pieraapracoŭki na ekspart (sumnieŭny varyjant), to ŭ rasiejski biudžet daviadziecca addać ((126 – 53) ch 17 młn. tonaŭ) 1241 młn. dalaraŭ. Razam z užo zapłačanym uvaznym mytam na ŭvachodzie ŭ Biełaruś – 2354 młn. USD.
Voźmiem inšy varyjant. Biełaruskija NPZ pieraapracoŭvajuć štohod 18 młn. tonaŭ. Bolej technična nia mohuć. Minus 4 młn. tonaŭ na ŭnutrany rynak. Usiaho dla ekspartu zastajecca 3 młn. tonaŭ syroj nafty ((126 – 53) ch 3 młn. tonaŭ) = 219 młn. dalaraŭ. Akramia taho, źjaŭlajecca 9,8 młn. tonaŭ śvietłych naftapraduktaŭ (hłybinia pieraapracoŭki nafty na biełaruskich NPZ krychu vyšej za 70%. (Na Kiryskim NPZ u Rasiei – bolš za 80). Takim čynam, ličym «śvietłyja naftapradukty» ((108 – 53) ch 9,8 młn. tonaŭ) = 539 młn. dalaraŭ. Usiaho ŭ biudžet RF idzie (1113 + 219 + 539) = 1871 młn. USD.
Sapraŭdy, u hetym varyjancie biełaruskija NPZ zahružanyja, ale RB pavinna addać u rasiejski biudžet 5,3% VUP. Voś taki «biełaruski varyjant»…
Adnak jość i pastka. Niama iluzijaŭ, biełaruskija ŭłady hienetyčna nia zdolnyja vykonvać abiacanaje i jany abaviazkova pasprabujuć padmanuć Maskvu. U Biełarusi padmanuć rasiejskaje kiraŭnictva ličycca dobleściu… Adnak, jość padazreńnie, što Maskva ŭličvaje hetuju tradycyju biełaruskaj kirujučaj namenklatury. Tamu Kudryn užo zahadzia, pacirajučy ruki, kaža pra toje, što rasiejski biudžet atrymaje bolš za 3 młrd. USD. Rasiejskaje kiraŭnictva budzie litaralna pilnavać kožnuju tonu nafty, što reekspartujecca. Staŭka tut vielizarnaja – 3780 młn. USD – amal 11% biełaruskaha VUP. Heta katastrofa dla biełaruskaj ekanomiki.
Ciapier biełaruskija ŚMI sprabujuć nam dakazać, što A. Łukašenka nie sastupiŭ u treci raz Maskvie za apošnija dva tydni, a viadzie biełarusaŭ ad pieramohi da pieramohi. Kali pierad nami «pieramoha» Łukašenki, dyk što tady nazvać parazaj?
Zastajecca tolki nahadać: «Adpaviedna z padpisanym pahadnieńniem pra miery pa ŭrehulavańni handlova-ekanamičnaha supracoŭnictva ŭ sfery ekspartu nafty i naftapraduktaŭ, u 2007 hodzie Rasieja budzie atrymlivać 70% myta, a Biełaruś - 30%, u 2008 hodzie - adpaviedna 80% i 20%, u 2009 hodzie - 85% i 15%. Pieraličvajem: na zachodniaj miažy za tonu rasiejskaj nafty, što idzie na reekspart, biełarusam daviadziecca addać u rasiejski biudžet 126 USD za tonu i 75,6 USD za tonu naftapraduktaŭ. U hetym vypadku, chutčej za ŭsio, užo zapłačanyja 53 USD buduć zaličanyja. Jość i ŭmova: biełarusy zatrymlivajuć płaciažy ŭ rasiejski biudžet – imhnienna na ekspart nafty ŭ RB uvodziacca standartnyja mytnyja pošliny».
Akramia taho, užo atrymanaje MIERKAVAŃNIE, što ŭžo zapłačanyja 53 USD NIA ŬLIČVAJUCCA pry pierasiačeńni syroj nafty i naftapraduktaŭ zachodniaj miažy Biełarusi. U hetym vypadku biełarusy zapłociać usio tyja ž 180 USD za tonu syroj nafty. Faktyčna, vyvaz nafty z RB zakryty…
