Na pytańni adkazvaje Mikoła Hałabarodźka ([email protected]), lekar?infiekcyjanist, aśpirant kafiedry infiekcyjnych chvarobaŭ Biełaruskaj miedyčnaj akademii paśladypłomnaj adukacyi.
— «Hryp» u pierakładzie z francuzskaj aznačaje «źnianacku chapać», «dušyć». Zvyčajna mienavita tak jon siabie i pavodzić: štozimu hryp «chapaje», kaho lahčej, kaho ciažej, patrochu «dušyć» usich niezaležna ad statusu, uzrostu ci seksualnaj aryjentacyi. U naš prahresiŭny čas možna davoli lohka praduchilić zaražeńnie hrypam ci prynamsi palehčyć jahonaje ciačeńnie. Kab nabyć adpornaść da zarazy, dastatkova pryščapicca.
Pryščepki, jakija jašče letaś byli dastupnyja šyrokim kołam biełarusaŭ praz palikliniki, zaraz treba šukać pa miedyčnych firmach.
U narodzie isnuje dumka, što hryp - lohkaja zaraza: varta pieračakać - i sama projdzie. Niebiespadstaŭna: šmat chto chvareje na hryp sapraŭdy lohka, adno što «vybivajecca z kalainy» na peŭny termin. Adnak jość hrupy ryzyki: heta, pa-pieršaje, dzieci (asabliva ad 2 da 5 hod) i staryja (bolš za 65 hadoŭ), u jakich hryp zvyčajna praciakaje ciažej i vyklikaje šerah uskładnieńniaŭ. U čas epidemii hrypu prykmietna padvyšajecca kolkaść hipiertaničnych kryzaŭ, infarktaŭ serca i dyjabietyčnych komaŭ. U dziaciej hetaja infiekcyja ŭskładniajecca branchitami, pnieŭmanijami, zapaleńniem vucha dy inšymi patałohijami. Na žal, štohod chto-niebudź hinie ad uskładnieńniaŭ hrypa.
Biezumoŭna, usich tych, kamu pahražaje niebiaśpieka ad hrypu, - dziaciej, starych, chranična chvorych - treba pryščapić.
Adpornaść raźvivajecca ŭžo praz dva-try tydni paśla ŭviadzieńnia vakcyny i trymajecca na praciahu hoda. Bolš doŭhaje dziejańnie i nie patrebna - pošaści hrypu štohod vyklikajucca roznymi typami virusaŭ i roznymi ich spałučeńniami. Tamu kožny hod sintezujecca admysłovaja pryščepka.
Pryščapicca nie pozna i zaraz, bo samy razhar pošaści jašče napieradzie - pa prahnozach lekaraŭ jon nadydzie bližej da lutaha-sakavika. Treba pamiatać, što samy ciažki hryp, toj, što z proćmaj uskładnieńniaŭ, nadarajecca naprykancy epidemii, niedzie ŭ sakaviku.
Na Biełarusi dastupnyja niekalki pryščepak. Našyja palikliniki dla imunizacyi časta i praciahła chvarejučych ludziej (spytajciesia ŭ vašaha ŭčastkovaha lekara, ci nie padpadajecie pad hetuju katehoryju vy ci vašyja dzieci) zabiaśpiečany tak zvanaj celnaviryjonnaj vakcynaj. Jana vykarystoŭvajecca tolki dla ludziej, starejšych za 7 hod. Pryščapicca ŭ paliklinicy, kali pašancuje, možna zadarma.
Miedyčnyja firmy zakupajuć bolš darahija, ale bolš ačyščanyja, tamu bolš biaśpiečnyja i efiektyŭnyja vakcyny - subadzinkavyja «Hrypoł» (rasijskaja i, darečy, kali nabyvać u Rasii, tańniejšaja) i «Influvak» (SolvayPharma), tak zvanyja split-vakcyny, jašče bolš čystyja - «Vaksihryp» (AventisPasteur) i «Fluaryks» (SmithKline Beecham). Hetyja pryščepki mohuć vykarystoŭvacca ŭ dziaciej z 6 mieciačnaha ŭzrostu. Kaštujuć jany ad 5 da 10 dalaraŭ. Biezumoŭna, lepš vydatkavać hetyja hrošy zaraz, na prafiłaktyku, čym potym, na leki i pracedury.
I navat kali Vy i Vašyja rodnyja ŭžo pryščapilisia, majecie adpornaść - kali łaska, nie zabyvajciesia na tradycyjnyja srodki zaściarohi ad hrypu: dobry nastroj, zdarovy ład žyćcia, čyścinia, užyvańnie polivitaminaŭ, adaptahienaŭ (eleŭterakok, žeńšeń dy inš), miodu i babulinaha sočyva z maliny.
Byvajcie zdarovyja!
Fota z błohu thierrynardoux.com
