Pres‑słužba MNS padviała vyniki niadaŭniaj stychii. Try čałavieki paciarpieli, adzin ź ich špitalizavany. Najbolš ad škvalistaha vietru paciarpieli Haradzienščyna i Mienščyna. Usiaho pa Biełarusi biez elektryčnaści časova zastavalisia 1 283 pasieliščy, byli paškodžanyja bolš za 2 050 transfarmatarnych padstancyjaŭ, zvyš 60 km linijaŭ elektrapieradačy. U stalicy pavalenyja vietram drevy spryčynilisia da časovaha prypynieńnia ruchu haradzkoha transpartu.
Ramontnyja pracy praciahvajucca j ciapier. Raboty chopić: stychija parušyła dachoŭku ŭ 140 žyłych damach, 27 vytvorčych zbudavańniach, u roznaj stupieni paškodžanyja bolš za 1 070 sielskahaspadarčych abjektaŭ.
Tym časam synoptyki papiaredžvajuć pra čarhovuju niebiaśpieku: 19 studzienia (piatnica) čakajecca mocny zachodni i paŭnočna‑zachodni viecier chutkaściu 17‑22 m/s. Miescami paryvy vietru mohuć dasiahać do 25‑28 m/s (90-100 km/h). Čakajecca taksama doždž sa śnieham.
Praktyka pakazvaje, što ŭ takoje nadvorje niebiaśpiečna znachodzicca pobač z drevami i niaŭstojlivymi pierad mocnym vietram kanstrukcyjami, kštałtu reklamnych bihbordaŭ, darožnych znakaŭ. Nia varta pakidać u hetych miescach aŭto. Niebiaśpiečnaj u taki čas robicca i dachoŭka. U kvaterach dy pracoŭnych pamiaškańniach treba ščylna začyniać vokny.
