8 vieraśnia – Dzień biełaruskaj vajskovaj słavy + śviatočnaja afiša, redkaje videa 13

8 vieraśnia 1514 hoda vojski VKŁ pad zahadam hietmana Kanstancina Ivanaviča Astrožskaha raźbili pad Oršaj maskoŭskich zachopnikaŭ.

«U našaj daŭniaj historyi niama inšaj padziei, jakaja b stała padobnym simvałam i vyklikała stolki ž vostrych batalij, jak bitva pad Oršaj. Heta

vialikaja pieramoha nad namnoha bolšym maskoŭskim vojskam, zdabytaja ŭ abarončaj vajnie, na svaich ziemlach i svajoj ža armijaj, kiravanaj svaim (pravasłaŭnym!) hietmanam.

Pačynalniki biełaruskaj nacyjanalnaj histaryjahrafii bačyli ŭ joj

najlepšy dokaz histaryčnaj niatojesnaści biełarusaŭ i vialikarusaŭ.

A dla historykaŭ rasiejskich, naadvarot, jana była ci nie samaj „niazručnaj“ padziejaj, što nijak nie ŭpisvałasia ŭ kancepcyju „adzinaha słavianarasijskaha narodu“. Voś ža staŭleńnie da hetaj bitvy ŭ samoj Biełarusi i vyznačałasia zmahańniem rasijskaha bačańnia ź biełaruskim», — piša historyk Hienadź Sahanovič. Całkam jaho artykuł «Vajskovaja słava i biassłaŭje historykaŭ» pra značeńnie Aršanskaj bitvy čytajcie tut.

Ad pačatku 1990-ch 8 vieraśnia adznačajecca Dzień biełaruskaj vajskovaj słavy. U pieršyja hady

vajskoŭcy prymali ŭračystuju prysiahu na viernaść Biełarusi.

Za Łukašenkam śviata stała niefarmalnym, a navat pieraśledavanym.

Bitva pad Oršaj. Karcina XVI st.

Uračystaja prysiaha na viernaść Biełarusi. Płošča Niezaležnaści. 1992 hod.

Fest "Aršanskaja bitva" na Krapivienskim poli. Śpiavaje Andrej Mielnikaŭ.

Sioleta Dzień biełaruskaj vajskovaj słavy adznačycca bitvaj paduškami ŭ Minsku i bardaŭskim festam na Krapivienskim poli.

Paduškavaja batalija projdzie ŭ Minsku ŭ Parku Horkaha 10 vieraśnia, a 17.00. «U prahramie: finał indyvidualnych bajoŭ paduškami i, kaniečnie, hrandyjozny machač pamiž kamandami biełych i čyrvonych», — kažuć arhanizatary. Udzielnikaŭ prosiać uziać z saboj paduški i dobry nastroj.

Minułyja razy bojki paduškami byli taksama prymierkavanyja da znakavych bitvaŭ biełaruskaj historyi

Tradycyjny fiestyval bardaŭskaj pieśni adbudziecca

na levym bierazie Dniapra pry ŭpadzieńni ŭ jaho rečki Krapivienki 11 vieraśnia. Budzie vohnišča i śpievy.

Zajhrajuć Andrej Mielnikaŭ, Nata Puškarova, inšyja bardy.

Da miesca možna dajechać ad aŭtavakzała aŭtobusam ci maršrutkaj Orša-Dubroŭna da prypynku «Haćkaŭščyna». Fest zadumany jak impreza vychadnoha dnia ŭ farmacie open air, tamu pačynajecca viečaram i doŭžycca ŭsiu noč z tym, kab za niadzielu ŭdzielniki zmahli vyspacca i dabracca dadomu. Fest prachodzić na adkrytym pavietry tamu varta padumać pra adpaviednuju vopratku, zapas ježy i namiot.

Siońnia ž — vinšujma siabroŭ i znajomych sa śviatam. Na žal, u stalicy niama manumienta, da jakoha možna było b prynieści kvietki ŭ honar Aršanskaj pieramohi. Dyj u cełaj Biełarusi pakul niama. Ušanujma pamiać usich zmaharoŭ za Niezaležnaść — pakładziom kvietki Kupału.