Sumny rekord: Za vychadnyja na darohach zahinuli 27 čałaviek 1

U Biełarusi za minułyja vychadnyja i piatnicu, jakaja im papiaredničała, zahinuli 27 čałaviek.

Heta vielmi vialikaja ličba, jakoj daŭno nie fiksavałasia (zvyčajna ŭ vychadnyja na darohach hinie 5–6 čałaviek). Asnoŭnymi pryčynami DAI nazyvaje pieravyšeńnie chutkaści, parušeńnie praviłaŭ manieŭryravańnia i elemientarnuju niaŭvažlivaść na darohach.

Jak raskazała staršy inśpiektar pa asablivych daručeńniach UDAI MUS Hanna Banadyk, u vychadnyja zarehistravana niekalki bujnych DTZ sa śmiarotnym vynikam.

U bolšaści ź ich za rulom znachodzilisia maładyja kiroŭcy (da 30 hadoŭ), i da avaryi pryviała ich niaŭvažlivaść na darozie razam z parušeńniem praviłaŭ.

Akramia taho, aŭtamabili byli całkam zapoŭnienyja pasažyrami, što taksama nie spryjała ŭvažlivaści kiroŭcaŭ.

18 vieraśnia ŭ 4 hadziny ranicy na pieršym kiłamietry aŭtadarohi Drahičyn-Asaŭcy-Bielin adbyłasia trahiedyja, u jakoj zahinuła čaćviora maładych ludziej. Minčanin 1980 h.n. kiravaŭ aŭtamabilem «Nisan Premjera». Prajechaŭšy zakruhleńnie darohi małoha radyusa, jon nie spraviŭsia z kiravańniem i źjechaŭ u levy pa chodu ruchu kiuviet, nalacieŭšy tam na dreva. Kiroŭca, jaho žonka 1985 h.n. (abodva minčanie) i žychar Drahičyna 1993 h.n zahinuli na miescy. Jašče adzin pasažyr, taksama žychar Drahičyna 1992 h.n., pamior pa darozie ŭ balnicu.

Śviedka zdareńnia, kiroŭca hužavoj pavozki raskazaŭ, što aŭtamabil abahnaŭ jaho na vialikaj chutkaści, i jon źviarnuŭ uvahu na toje, što habarytnyja ahni niejak raptam źnikli. Padjechaŭšy da miesca zdareńnia, śviedka ŭbačyŭ u kiuviecie aŭtamabil, jaki litaralna visieŭ na drevie.

Pavodle papiaredniaj infarmacyi, kiroŭca z žonkaj znachodzilisia na dni narodzinaŭ, a paśla vyrašyli padvieźci dvaich haściej śviata dadomu.

Jašče adna avaryja ź vialikaj kolkaściu achviar adbyłasia ŭ piatnicu, 16 vieraśnia.

Na 60-m kiłamietry aŭtadarohi Minsk-Hrodna23-hadovy žachar Lidy na aŭtamabili «Sitraen Ksancija» padčas abhonu vyjechaŭ na sustrečnuju pałasu.

Adbyłosia łabavoje sutyknieńnie z «Sitraenam Ksara», jakim kiravaŭ minčanin 1957 h.n. U vyniku DTZ pasažyry «Sitraena Ksancija» 1988 i 1979 h.n., abodva žychary Asipovičaŭ, zahinuli na miescy. Siastra kiroŭcy 1987 h.n., žycharka Minska, pamierła pa darozie ŭ balnicu. Kiroŭca i studentka-minčanka 1987 h.n. dastaŭleny ŭ reanimacyju Vałožynskaj rajonnaj balnicy. Tudy ž dastaŭleny kiroŭca «Sitraen Ksara» i jaho pasažyrka, minčanka 1962 h.n.

— Analizujučy avaryi, jakija adbylisia ŭ apošni čas, vidavočna, što pryčyna mnohich ź ich — elemientarnaja niaŭvažlivaść razam ź pieravyšeńniem chutkaści i parušeńniem praviłaŭ manieŭryravańnia i abhonu. Tamu chočacca źviarnuć uvahu kiroŭcaŭ na toje, što za rulom treba pastajanna prahnazavać situacyju i zachoŭvać uvahu, — nahadała Hanna Banadyk.

Alena Aŭčyńnikava, Źviazda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH