zajaviŭ Alaksandr Łukašenka 26 vieraśnia padčas rabočaj sustrečy sa staršynioj Biełaruskaha dziaržaŭnaha kancerna pa nafcie i chimii Iharam Žylinym.
Jak paviedamlaje pres-słužba prezidenta, Łukašenka prapanavaŭ kiraŭniku "Biełnaftachima" abmierkavać pytańni pastaŭki nafty, jaje cany, a taksama chod adpaviednaha pieramoŭnaha pracesu z rasijskim bokam. "Mnie zdajecca, što tam pavinny być zruchi takija, jak i pa hazavych pytańniach. Ja sustrakaŭsia z Alaksiejem Mileram — tam stanoŭčyja tendencyi ŭ našych intaresach. Małajcy rasijanie, jany razumiejuć, što nam niaprosta ciapier, i jany hatovy iści nasustrač. Pažadana viedać, što ŭ nas adbyvajecca z naftaj", — zajaviŭ biełaruski kiraŭnik.
Łukašenka taksama prapanavaŭ Žylinu raskazać ab farmiravańni chołdynhaŭ u naftahazavaj pramysłovaści: "My pačali stvareńnie chołdynhaŭ pa ŭsioj pramysłovaści, pa ŭsioj krainie. Skažu prama, što jość prablemy ŭ suviazi z hetym. Chaciełasia b pačuć ad vas, jak idzie farmiravańnie hetych chołdynhaŭ. Treba adkarektavać niekatoryja pytańni, kab my droŭ nie nałamali. A tak my ŭ viedamstvie, jakoje narmalna funkcyjanuje, možam atrymać niamała prablem. Nam jany absalutna nie patrebnyja".
Paśla rabočaj sustrečy Žylin paviedamiŭ, što "kiraŭnika dziaržavy cikaviła praca kancerna jak na biahučy momant tak i na budučyniu z ulikam taho, što kancern pa svaim abjomie — heta tracina ŭsioj vałavoj pradukcyi krainy". "Tut zasiarodžany i chimija, i naftachimija, tut zasiarodžany našy kalijnyja ŭhnajeńni. I daručeńnie jość asabliva razabracca z pracaj Biełaruskaj kalijnaj kampanii, tamu što heta vielmi cikava dla krainy. Heta adziny resurs, jaki zdabyvajecca nami, i jon pavinien maksimalna efiektyŭna realizoŭvacca našaj krainaj, našymi pasrednikami", — cytuje pres-słužba prezidenta staršyniu "Biełnaftachima".
Pavodle jaho słoŭ, Łukašenku taksama cikaviła praca tavarapravodnych sietak. Jon daručyŭ kiraŭniku kancerna sumiesna z kiraŭnikami ŭrada razabracca z debitorskaj zapazyčanaściu. "Debitorskaja zapazyčanaść u krainy bolš za 5 młrd. dołaraŭ pry tym, što my pazyčajem hrošy. Našy tavary, pakul što nie apłačanyja, znachodziacca za miežami respubliki, i zadača viarnuć hetyja hrošy stavicca vielmi surjozna", — adznačyŭ Žylin.
"Pytańni ŭsie byli źviazany ź siońniašniaj i zaŭtrašniaj dziejnaściu, sa stvareńniem chołdynhu na asnovie kancerna, kab kiravać bolš efiektyŭna z umovaj uvachodžańnia ŭ Adzinuju ekanamičnuju prastoru, dzie my jakraz i budziem sutykacca z rynačnikami, i kab u nas byli miechanizmy rynačnaha ŭpłyvu i ŭzajemadziejańnia z našymi rasijskimi i kazachstanskimi partniorami", — adznačyŭ kiraŭnik "Biełnaftachima".
Jon paviedamiŭ, što ŭ chołdynh uvojduć usie, chto na siońniašni dzień znachodzicca ŭ kancernie "Biełnaftachim". Stvaryć jaho płanujecca da kanca hoda, pry hetym nie razdrabniajučy ŭdzielnikaŭ pradpryjemstvaŭ. "Jość pramoje ŭkazańnie prezidenta ni ŭ jakim razie siońnia nie sprabavać razvalić na asobnyja chołdynhi. Unutry ŭłasnaj kampanii, kali łaska, vydzialajcie kirunki, biźniesy, jakija b bolš efiektyŭna kiravalisia, u tym liku finansava", — skazaŭ Žylin.
Pavodle jaho słoŭ, taksama "vielmi surjozna razhladałasia" pytańnie efiektyŭnaha vydatkoŭvańnia srodkaŭ na realizacyju inviestycyjnych prajektaŭ. Kancernu "Biełnaftachim" i ŭradu daručana razhledzieć adpaviednyja pytańni i pryniać rašeńni, jakija mahli b dapamahčy dziaržavie bolš efiektyŭna vykarystoŭvać resursy.
