Dažynki-2011 adkryvajucca siońnia ŭ Maładziečnie. U Redakcyju «NN» trapiŭ kaštarys śviata: 708 miljardaŭ rubloŭ.
Niapeŭny kurs dalara nie dazvalaje pieraličyć biudžet śviata ŭ valutu, tamu, u adroźnieńnie ad papiarednich hadoŭ, budziem padavać ličby mienavita ŭ rublach. Da honaru arhanizataraŭ adznačym, što kala pałovy srodkaŭ było asvojena jašče da devalvacyi. U papiarednija hady finansavańnie raściahvałasia da apošnich dzion.
Takim čynam, na što pojduć bolš za 700 miljardaŭ? Samaj darahoj cackaj «horada sonca», jak časam nazyvajuć Maładziečna, stanie spartyŭna-zabaŭlalny kompleks. Zhodna z zaćvierdžanaj prahramaj, jaho finansavańnie paciahnuła na 145 miljardaŭ rubloŭ.
Piataja častka ŭsich hrošaj — na Ladovy pałac
Heta adna piataja častka ad usich vydzielenych srodkaŭ. Pavodle apisańnia BiełTA, heta budzie «sučasny šmatfunkcyjanalny kompleks, dzie možna budzie pravodzić nie tolki spartovyja spabornictvy, ale i masavyja mierapryjemstvy, kancerty. U skład kompleksu ŭvojduć trenažornyja, spartovyja zały, miedyka¬adnaŭlenčy centr, a taksama płavalny basiejn z elemientami akvaparku». Kali kazać sproščana — Ladovy pałac na 2800 miescaŭ jak simvał «Dažynak». Padobnyja zbudavańni ŭžo źjaŭlalisia ŭ takich chakiejnych haradach, jak Pružany, Lida i Kobryn.
Druhi šyk — štučnaje voziera ŭ centralnym parku Pieramohi. «Rekanstrukcyja parku kultury i adpačynku» kaštavała amal 27 miljardaŭ rubloŭ. Tut zrabili vodnyja pierakaty, pabudavali fantany i altanki, a taksama zakłali Vostraŭ zakachanych.
Budaŭnictva amfiteatra kaštuje tańniej — usiaho 21 miljard rubloŭ. Jon užo paśpieŭ zapracavać. U kancy žniŭnia ŭ im try dni pravodziŭsia Nacyjanalny fiestyval biełaruskaj pieśni i paezii.
Na ramont zbudavańniaŭ sacyjalnaj śfiery — škoł, paliklinik, centraŭ zaniataści — vydzielena 65 miljardaŭ rubloŭ. Handlovyja abjekty i abjekty hramadskaha charčavańnia acenienyja ŭ 7 miljardaŭ.
Narešcie, kapramont 98 žyłych damoŭ u samim Maładziečnie kaštavaŭ biudžetu amal 32 miljardyrubloŭ, ramont i afarboŭka jašče stolki ž — 7 miljardaŭ.
